Олунньу 5 күнүгэр быыстапкалыыр саалаҕа дьон-сэргэ бөҕө муһунна. Бу күн манна Саха Республикатын уус-уран оҥоһуктарын маастара Анна Николаевна Семенова “Утум ситимэ” персональнай быыстапката арылынна.
Бу быыстапка Анна Николаевна үбүлүөйүн кытта дьүөрэлээн буолла
Анна Николаевна Бүлүү улууһун Кыргыдайыгар элбэх оҕолоох дьиэ кэргэҥҥэ төрөөбүтэ.
Кини 10 республика, 3 региональнай, 2 Россия, 3 Аан дойду таһымнаах быыстапкалары туруоран, ситиһиилэнэн, үрдүктүк сыаналаммыт маастар, “Этно-эрато 2018” Евразийскай күрэх кыайыылааҕа, “Солнечный олень — 2018” көһө сылдьар фестиваль III степеннээх лауреата буолар.
Быыстапкаҕа Анна Николаевна тикпит сонноро, былааччыйалара, көбүөрдэрэ, чаппараактара уонна да араас оҥоһуктара турдулар. Тэрээһини Бүлүү улууһун культуратын управлениетын специалиһа Надежда Николаевна Иванова иилээн-саҕалаан ыытта.
Анна Николаевна Семенова
Анна Николаевнаҕа улуус дьаһалтатын уонна бэтэрээннэр Сэбиэттэрин аатыттан Герасим Алексеевич Солтуев, республикатааҕы “Симэх” национальнай киин фондаҕа отделын сүрүннүүр специалиһа Азияна Филипповна Харлампьева, улуустааҕы культура управлениетын начальнига Алёна Александровна Дашевская, “Тоҕус нэһилиэгэ” муниципальнай тэриллии баһылыга Афанасий Васильевич Васильев, Амма улууһуттан СР норуотун маастара Валентина Васильевна Стручкова – Сарыада Уус, Нам улууһуттан СР норуотун маастара, туоһу ыллатар уус Татьяна Алексеевна Карамзина, Сунтаар улууһуттан “Ситии” түмсүүтэ (салайааччы СР норуотун маастара, СР суруйааччыларын Союһун чилиэнэ Валентина Григорьевна Дьячковская), улуустааҕы Уустар түмсүүлэрин аатыттан Николай Ильич Гоголев, Иван Тимофеевич Павлов, Виктория Алексеевна Леонтьева, Балаҕаччыттан “Далбар” түмсүү эҕэрдэ тыл эттилэр, бэйэлэрин өйдөбүнньүк бэлэхтэрин туттардылар.
Анна Николаевна кэлбит дьоҥҥо махтанна. Быыстапка арыллыытын тэрээһинэ уопсай хаартыскаҕа түһүүнэн түмүктэннэ. Бу быыстапка олунньу 5-10 күннэригэр Олоҥхо дьиэтин быыстапкалыыр саалатыгар (саха балаҕаҥҥа) туруоҕа.
Улуустааҕы культура управлениета.
