🔸Самаан сайын салаллан кэлэн, сир-дойду күөҕүнэн чэлгийэн, хонуу-сыһыы дыргыл сыттаах сибэккинэн киэркэйбитин уруйдаан, саха киһитэ барахсан ыһыах ыһар кэтэһиилээх, долгутуулаах кэмэ бу тиийэн кэллэ. Ол курдук быйылгы Олоҥхо ыһыаҕа киэҥ-нэлэмэн сирдээх-уоттаах, өҥ-быйаҥ буордаах, араас омук түөлбэлээн олорор аатырар Өлүөхүмэ сиригэр ыытылларынан уратыланар.
🔸Биһиги улууспут тойуксуттарын, олоҥхоһуттарын, норуот ырыаһыттарын өбүгэ саҕаттан илдьэ кэлбит баай фольклордарын көрдөрө-иһитиннэрэ, олоҥхолуу, тойуктуу, Бүлүү аатын-суолун көмүскүү барыахтаах аҕыйах киһилээх бөлөх салайааччыта, СӨ култууратын туйгунун, СӨ үтүөлээх үҥкүү тылын этээччитин Николай Афанасьевы – Айдаманы көрсөн кэпсэттибит. Кини саха норуотун биир бастакы идэтийбит композитора М.Н.Жирков аатынан саҥа култуура Дыбарыаһыгар саха фольклорун салгыы сайыннарыыга сүрүн испэсилииһинэн үлэлиир.
🔸Биһиги тиийэрбитигэр култуура Дыбарыаһын иккис этээһин дьоҕус саалатыгар «Дьырыбына Дьырылыатта» диэн олоҥхону сөптөөх толорор турукка киирэрдии иэйэн-куойан туран, куоластарын сааһылаан,этэр-саҥарар тылларын үөрэтэн бэлэмнэнэ ахан сылдьаллара. Чопчу Николай Афанасьевтан -Айдамантан бу бэлэмнэнии туһунан ыйыталастыбыт, онуоха кини маннык кэпсээтэ:
— Бу саҥа эдэр коллективы сүүмэрдээн, бары өттүнэн ирдэниллэр уонна көрүллэр түһүмэхтэри этэҥҥэ ааһан, уопсайа 11 киһини таһынан, өссө эбии 3 солистаах дьоҕус норуодунай фольклорнай амсаамбыл тэриннибит. Саамай аҕа саастаахтара – мин, онтон атыттара орто саастаахтар, үгүстэрэ эдэр ыччаттар. Онон баҕа санаабыт диэн улахан, бу оҕолор олус үлэһиттэр, түргэнник ылыналлара, сатыыллара, билэллэрэ, кыһаллаллара сорох ардыгар киһини сөхтөрөр. Ол эрээри аһара түспэккэ, халлааны харбаабакка, биир тэтимҥэ сылдьыахха наада дии саныыбын.
🔸Үгүс кэпсэтии, ырытыһыы кэнниттэн уопсай сүбэнэн «Дьырыбына Дьырылыатта» олоҥхону толорор буоллубут. Онон бары оруоллары үллэстэн, олоҥхобут ис хоһоонун, тылын-өһүн үөрэтэ сылдьаллар. Биллэрин курдук, үөрэтиини, эрчиллиини, бэлэмнэниини сэргэ биир үксүн ZOOM, онлайн сибээһинэн, видеосъемка нөҥүө үлэлиибит. Итэҕэһи-быһаҕаһы ырытыһабыт, биир тылынан эттэххэ, үлэ күөстүү оргуйар.
🔸Маны сэргэ биһиги артыыстарбыт дэгэрэҥ ырыаҕа, чабырҕахха, тойукка, туойсууга, оһуокайга, хоһуйсууга уо.д.а. ыытыллар бары куонкурустарга кытталлара олус наадалаах уонна булгуччулаах. Ситиһии төрдө, аат-суол кэлиитэ барыта итинник көрүүлэртэн саҕаланар буоллаҕа дии. Саамай кылаабынайа, Өлүөхүмэҕэ Олоҥхо ыһыаҕар ситиһиилээхтик кыттан, бириистээх миэстэлэргэ тиксэн, кыайыы көтөллөнөн кэлбит киһи диэн бүччүм баҕа санаалаахпыт, — диэн түмүктээтэ Николай Афанасьев – Айдаман.
Николай ФЕДОРОВ.
Сайт олохсуола.рф
