I-кы Чочуттан төрүттээх, Олоҥхоһут, тойуксут, үҥкүү тылын этээччи Михаил Семенович Шадрин төрөөбүтэ 95 сылыгар аналлаах Бүлүү улууһугар Олоҥхо декадатын арыллыыта, бүгүн сэтинньи ый 19 күнүгэр Баһылай В.О. Каратаев аатынан Олоҥхо дьиэтигэр үрдүк тэрээһиннээхтик буолан ааста. Сахалыы таҥастаах уһуйаан иитиллээччититтэн саҕалаан эмэн саастааҕар тиийэ сүүһүнэн киһи тоҕуоруһа муһунна. Биһиги Бүлүүбүт сирэ-дойдута олоҥхо уутуйан үөскээбит түөлбэтинэн биллэр. Былыр-былыргыттан хас биирдии нэһилиэккэ үөскээн-үөдүйэн сылдьыбыт олоҥхоһуттарбытыттан бастыҥнара талааннаахтара, норуот кытаанах дьүүлүн тулуйан, үйэлэр усталарыгар сүтэн-симэлийэн, өлбөөдүйэн хаалбакка, өрө үүнэн биһиги күннэрбитигэр диэри номох буолан кэпсэнэ сылдьаллар, норуокка биллэр улууспут маннык олоҥхоһуттарын киэн тутта ааттыыбыт: Каратаев Семен Николаевич-Ырыа Дыгыйар, Седалищев Николай Иванович-Мөчөкө Ньукулай, Менкяров Семен Ильич-Мэҥкэр Сэмэн, Еремеев Степан Иванович-Дэдэгэс, Ксенофонтов Алексей Дмитриевич-Аманааскы, Гоголев Трофим Петрович-Олоҥхоһут Доропуун, Алексеев Борис-Олоҥхоһут Барыыс, Еремеев Николай Васильевич-Тыккаа уо.д.а. кинилэри салҕааччыларынанАфанасий Васильев-Хоохура Охонооһой, Каратаев Василий Осипович-Харатай Баһылай, Борокуоппай Махсыымап Мэхээлэ Саадырын уо.д.а.
Ааспыт үйэлэргэ Бүлүү улууһугар улахан олоҥхоһуттар уутуйан олорон ааспыт сирдэринэн Бороҕон, Тоҕус, 1-кы Чочу, Бөтүҥ, Кыргыдай уонна Үгүлээт буолалларын кинилэртэн утумнаан сылдьар дьон кутугар-сүрүгэр, олоҥхо тыына ордон сылдьар түөлбэлэрин билинии, үйэтитии соруга-билиҥҥи биһиги үлэбит сүрүн тосхоло.
«Бүлүү улууһа (оройуона)» муниципальнай оройуон дьаһалтатын дьыалатын салайааччыта Клара Валериановна Гаврильева, Оройуоннааҕы култуура сайдыытын уонна норуот айымньытын киинин салайааччытыгар Алена Александровна Дашевская эзэрдэ тыл эттилэр.
Н.Г. Чернышевскай аатынан Бүлүүтээҕи педагогическэй-профессиональнай колледж «Айылгы» ырыа-үҥкүү норуодунай ансамбылын фольклорун бөлөҕө, салайааччы Татьяна Андросова сахалыы тыыннаах доҕуһуоллаах норуот ырыаларын толорон кэлбит дьон кэрэхсибилин ыллылар. Татьяна Андросова хомуска оонньообутун көрөөччүлэр олус кэрэхсии, сэргии иһиттилэр, сөҕүү-махтайыы муҥура суох буолла.
Чочутааҕы «Күнчээнэ» уһуйаан иитээччитэ Елизавета Семеновна Томская оҕону олоҥхоҕо уһуйууга, олоҥхонон иитиигэ маастар кылаас көрдөрдө, дьон сэҥээриитин ылыан ылла.
Михаил Семенович Шадрин улахан кыыһа Арассыыйа Бочуоттаах кинематографиһа, СӨ култууратын туйгуна, Уус Маайа улууһун Бочуоттаах олохтооҕо «Гражданскай килбиэн» бэлиэ хаһаайына Валентина Михайловна Федорова махтал тылларын анаан туран бэйэтэ тикпит олбохторун кэллэктииптэргэ, салайааччыларга бэлэх уунна.
Михаил Семенович олох эдэр эрдэҕиттэн олоҥхону сэҥээрэн, истибит олоҥхолорун киҥинэйэн ыллыыр эбит. Онтон салгыы бэйэтэ айан толорор буолбут эбит, Айыы Кыыһа, Сырдык тааска сирэйин көрүнэн үөскээбит Сыралыма Куо, Үрүҥ аар Тойон Кыыһа, Абааһы Кыыһа ытык Кэҕэрдилээн Удаҕан, Айыы Удаҕаннара, Күн Кыыһа Күөгэлдьин Удаҕан, Ый Кыыһа Ылбалдьын Удаҕан, Абааһы Уола ойоҕос уҥуоҕа батыйалаах Умсары Холорук, Анараа Дойду анаарыйар ааттааҕа диэн дьоруойдардаах «Хатан халлаан уола Харалдьыктай Мохсоҕол» диэн олоҥхону толорбутун билигин кэллэктиибинэн да биирдиилээн толорооччулар да үгүстэр.
Баһылай Уоһукабыс Харатаайап аатынан Олоҥхоһуттар норуодунай кэллэктииптэрин толоруутугар «Хатан халлаан уола Харалдьыктай Мохсоҕол» олоҥхоттон быһа тардыыны истиэҕиҥ. Олоҥхоһут урут уһуллубутун кытта холбуу толордулар. Салайааччы СӨ култууратын туйгуна Светлана Тарасовна Иванова.
2005 сыллаахха сэтинньи 25 күнүгэр ЮНЕСКО быһаарыытынан, Олоҥхо аан дойду тылынан уонна материальнайа суох култууратын кылаан чыпчаалынан билиниллибитэ, маны сэргэ СӨ Бэрэсидьиэнин Ыйааҕынан бу историческай, култуурунай суолталаах күн Олоҥхо күнүнэн биллэриллибитэ.
Бүгүн биһиги анаан-минээн I-кы Чочуттан төрүттээх, Олоҥхоһут, тойуксут, үҥкүү тылын этээччи Михаил Семенович Шадрин төрөөбүтэ 95 сыла буолар күнүгэр, улууспутугар Олоҥхо Декадатын арыйдыбыт.
Эбиэттэн киэһэ «Уус кыһата» Быыстапкалыыр саалаҕа уонна В.О. Каратаев аатынан Олоҥхо дьиэтигэр Бүлүү улууһун мастардарын оҥоһуктарынан быыстапкалары арыйдыбыт.
Салгыы Кэллэктииптэр уонна биирдиилээн толорооччулар олоҥхолорун истии хойукка дылы салҕанан барда. Тэрээһин үрдүк таһымҥа барбытыгар бары кыттааччыларга, Михаил Семенович оҕолоругар, сиэннэригэр махталбытын биллэрэбит.
