Тохсунньу 30 күнүгэр Уус кыһатыгар «Кыл-сиэл абылаҥа» IV аһаҕас улуустааҕы быыстапка-күрэх кыттыылаахтарын чиэстиир тэрээһин буолан ааста.
Былыр-былыргыттан Бүлүү сирэ-уота биллэр-көстөр тимир, мас уустарынан, көтүллүбэт сииктээх иистэнньэҥнэринэн, хагдарыйан турар маһы көҕөрдө туойар уус-уран тыллаах олоҥхоһуттарынан, тойуксуттарынан, ырыаһыттарынан биллэр, суон сураҕырар.
Кинилэр истэригэр «ӨБҮГЭ УТУМА» олохтоох общественнай тэрилтэ (салаайааччы Виктория Алексеевна Леонтьева) таһаарыылаахтык үлэлиир-хамсыыр. Быыстапка-күрэх түмүгүнэн кыттааччылар сертификаттарынан, махтал, добун суруктарынан, сыаналаах бириистэринэн наҕараадаланнылар.
Сахабыт Сирин уонна улууспут иискэ-ууска үөрүйэхтэрин тилиннэрэн, харыстаан тута сылдьар уонна сайыннарар уран тарбахтаах талааннаахтарыгар өссө төгүл махтанабыт, айар тутар үлэлэригэр салгыы саҥа ситиһиилэри баҕарабыт.
