Тохсунньу 23 күнүгэр Староватов аатынан кыраайы үөрэтэр музейга олус интэриэһинэй тэрээһин буолла. Бүлүү Илбэҥэтиттэн төрүттээх ювелир-маастар Пётр Кузьмич Алексеев «Серебряный век якутских украшений» диэн быыстапкатын дьон-сэргэ дьүүлүгэр таһаарда. Ону тэҥэ историк-этнограф, эдэр чинчийээччи, М.К.Аммосов аатынан СВФУ преподавателэ Александра Николаевна Прокопьева үрүҥ көмүс оҥоһуктар туһунан дириҥ суолталаах лекция аахта.
Тэрээһин саҕаланыытыгар Бүлүү улууһун культуратын управлениетын аатыттан Надежда Николаевна Иванова тыл эттэ, тэрийээччилэргэ Махтал суруктары туттарда.
Бу тэрээһиҥҥэ элбэх киһи сырытта. Александра Николаевна лекциятыгар оҥоһуктар туох суолталаахтарын кэпсээтэ. Сахалар былыргы оҥоһуктарын историяларыттан элбэх саҥаны биллибит. Барытын экраҥҥа да, миэстэтигэр да көрдөрөн истилэр. Баҕалаах дьон тутан-хабан көрдүлэр, хаартыскаҕа түһэрдилэр, элбэх боппуруостары ыйыттылар.
Көмүс ууһа – сэдэх идэ
Пётр Кузьмич былыргыны сөргүтэн оҥорор эбит
Кини үлэлэрэ үгүстэрэ XIX уонна XX үйэ саҕаланыытыгар үөдүйэ сылдьыбыт оҥоһуктарга олоҕурбуттар. Манна ытарҕа арааһа, курдар, кыыс суһуоҕун киэргэлэ, онтон да атын сиэдэрэй симэхтээх, киһини сөхтөрөр сахалыы киэргэллэр бааллар. Миэстэтигэр сакаас ыллылар, оҥоһуктарын атыылаатылар.
Кэлэ сылдьыбыт дьон тэрийээччилэргэ махтаннылар, астынан, дуоһуйан тарҕастылар.
Улуустааҕы культура управлениета
