Муус устар 13 күнүгэр В.О. Каратаев аатынан Олоҥхо Дьиэтигэр Бүлүүбүт улууһун иистэнэр-уһанар, айар-тутар дьоҕурдаах дьоно норуот маастарын күнүгэр аналлаах “Уруйдан, Уус күнэ!” тэрээһиҥҥэ үөрэ-көтө муһуннулар.
Бэҕэһээ Уус Кыһатыгар “Өбүгэ утума – наследие предков” түмсүү салайааччыта Виктория Алексеевна Леонтьева Саха Өрөспүүбүлүкэтин Ил Дарханын Гранын ылбыт бырайыагынан VI аһаҕас «Күөрт күпсүйдүн, тимир ыллаатын!» быыстапка- күрэх аһылынна.
Биһиги Бүлүүбүт былыр-былыргыттан ыраах сиринэн аатырбыт уран уустарынан биллэр-көстөр. Көмүс сүүтүктээх иистэнньэҥнэрдээх буолан өбүгэлэрбит илии ииһигэр ураты суоллара-иистэрэ, үйэттэн үйэҕэ илдьэ сылдьыбыт ньымалар, үгэстэрэ күн бүгүн биһиэхэ тиийэн кэлэн утум салҕанар, сайдар.
Тэрээһин Алгысчыт, Саха Республикатын культуратын туйгуна Владимир Николаев-Тоорукча Аал уоту айах тутан Алгыс сиэрин-туомун толоруутуттан саҕаланна.
Алгыс туомун Саха Республикатын культуратын үтүөлээх үлэһитэ Августина Евсеева салайар Н.И. Ылахова аатынан “Алгыс” национальнай-культурнай Киин “Алгыс” хомусчуттарын ансамбла хоҥкунас хомус кутуллар тойугунан ыраастаан, арчылаан салҕаатылар.
Улуус дьаһалтатын социальнай политикаҕа отделын начальнига Аксинья Кудайбердиева, культура сайдыытын уонна норуот айымньытын оройуоннааҕы Киинин салайааччыта Алена Дашевская, бэтэрээннэр оройуоннааҕы Сэбиэттэрин бэрэссэдэтээлэ Герасим Солтуев, Сэбиэт солбуйар бэрэссэдээтэлэ Дмитрий Седалищев, Бүлүү куоратыттан Оройуон Сэбиэтин депутата Прокопий Захаров, П.Х. Староватов аатынан Бүлүүтээҕи кыраайы үөрэтэр түмэл сүрүннүүр специалиһа Сардаана Сыроватская Уус күнүнэн эҕэрдэлээтилэр, Бочуотунай Грамоталары, Махтал Суруктары туттардылар.
Истиҥ эҕэрдэ, барҕа махтал тыллара быйылгы Уус күнүн көрсө олохторун бэлиэ саастарын бэлиэтээбит биһиги киэн туттар биир дойдулаахтарбыт хомуһуннаах хомус уустара Николай Ильич Гоголевка-Бычаа Ууска, Михаил Николаевич Мальцевка – Кылаан Ууска ананнылар.
2016 сыллаахха “Бүлүү улууһун норуотун маастара” диэн бочуоттаах аат олохтоммута. Улуус баһылыга С.Н. Винокуров дьаһалынан бүгүн бу үрдүк аат икки маастарга – Мария Семеновна Филиппововаҕа уонна Егор Петрович Федоровка туттарылынна.
«Бүлүү улууһун бочуоттаах бэтэрээнин” аата норуот маастара Николай Николаевич Степановка ананна. Саха Республикатын “За вклад в развитие лоскутного шитья” анал бэлиэнэн норуот маастара Сусанна Семенова наҕараадаланна.
Тэрээһини хомусчут Нюргуяна Саввинова, ырыаһыттар Анна Черкашина, Александр Иванов киэргэттилэр.
Норуот маастара Сусанна Семенова (Бөтүҥ) киэргэллээх мааны саҕа тигиитигэр маастар-кылаас оҥордо. Салгыы уустар, түмсүүлэр салайааччылара Төгүрүк остуол тула кэпсэттилэр. Төгүрүк остуолу культура сайдыытын уонна норуот айымньытын оройуоннааҕы Киинин салайааччыта Алена Дашевская ыытта.
Бүлүүбүт талааннаахтара аан дойду, Россия, республика таһымнаах көрүү-быыстапкаларга, көрүүлэргэ ситиһиилээхтик кытталларыгар, улууспут аатын бастыҥнар ортолоругар ааттаталларыгар барҕа махталбытын тиэрдэбит!
Өбүгэ ситимин быспакка үйэтитэ сылдьар айымньылаах үлэҕитигэр өссө үрдүк ситиһиилэри, саҥа уонна сонун сүүрээннэри, уҕараабат кыаҕы, этэҥҥэ буолууну, доруобуйаны уонна дьолу соргуну баҕарабыт.
Бүлүү талааннаах уус дьоно,
Өбүгэ үгэһин үксэтэ,
Үүнэр көлүөнэҕэ тиэрдэ
Үөрэтэ, уһуйа сылдьыаҕыҥ,
Үйэлэргэ үйэтитэ туруоҕуҥ!
