Бүгүн олунньу 7 күнүгэр, ырыаҕа ылламмыт Ытык Бүлүүгэ СӨ Судаарыстыбаннай Сүбэһитэ, Геокултуурунай сайдыы үнүстүтүүтүн генеральнай дириэктэрэ, саха норуодунай артыыһа А. С. Борисов салайааччылаах, СӨ Олоҥхо Тыйаатыра кыттыылаах «СӨ Олоҥхо Дьиэлэрин биир кэлим ситимин олохтооһун» култуурунай экспедиция үлэтэ саҕаланна.
Ыалдьыттары саха сирин биллиилээх олоҥхоһута В. О. Каратаев аатынан Олоҥхо Дьиэтигэр СӨ култууратын туйгуна В. С. Николаев арчылаах Алгыстаах, Далбар Хотуттар сахалыы айах тутан күндүлээн көрүстүлэр. Олоҥхо Тыйаатырын артыыстара Олоҥхо Дьиэлэрин түмэр Алгыһы түһэрдилэр.
Салгыы ыалдьыттар В. О Каратаевка уонна саха норуодунай поэта И. М. Гоголев-Кындылга сүгүрүйэн пааматынньыктарыгар сибэкки дьөрбөтүн уурдулар.
М. Н. Жирков аатынан оройуоннааҕы култуура Дыбарыаһыгар ыалдьыттары Тойон Бүлүү, Бүлүү Хотун, Таба Хотун, Хомус Хотун, Төлөн Уол персонажтар, хомусчуттар, кырыымпаһыттар, Олоҥхоһут уруйдуу көрүстүлэр.
Пленарнай мунньахха А. С. Борисов, үнүстүтүүт толорооччу дириэктэрэ А. Н. Мартынов, Олоҥхо Тыйаатырын дириэктэрэ М. В.Турантаева экспедиция сыалын соругун туһунан иһитиннэрдилэр. Кэпсэтиигэ Бүлүү улууһун баһылыгын социальнай политикаҕа солбуйааччыта А. А. Прокопьев, култуура сайдыытын уонна норуот айымньытын Киинин салайааччыта А. А. Дашевская, Халбаакы нэһилиэгин баһылыга А. И. Васильев, Чочу нэһилиэгин баһылыга П. А. Догоюсов, норуот фольклорун тарҕатааччы, уһуйааччы К. П. Харлампьева, култуура сайдыытын уонна норуот айымньытын оройуоннааҕы Киинин методиһа Н. Н. Иванова, В. О. Каратаев аатынан Олоҥхо норуодунай кэллэктиибин салайааччыта С. Т. Иванова кытыннылар, санааларын эттилэр.А. С. Борисов олоҥхону тарҕатыыга, үйэтитиигэ ыытар утумнаах үлэлэрин бэлиэтээн С. Т. Ивановаҕа, В. С. Николаевка СӨ Судаарыстыбаннай сүбэһитин тус Махтал Суруктарын туттарда.
