Саха норуотун тылынан уус–уран айымньытын чыпчаала – Олоҥхоҕо анаммыт күн, сэтинньи 25 күнүгэр Сахабыт сирин киэҥ киэлитинэн дьоһуннаахтык бэлиэтэнэр.
Бу күн Олоҥхо дьиэтигэр Бүлүү улууһа киэн туттар олоҥхоһуттара Василий Осипович Каратаев – Харатай Баһылай төрөөбүтэ 95, Семен Николаевич Каратаев –Ырыа Дыгыйар төрөөбүтэ 160 сылларыгар анаан, кинилэр үтүө ааттарын, ырыаларын-тойуктарын үйэтитэр сыаллаах олоҥхо декадата үөрүүлээхтик арылынна..
Бүлүү улууһугар олоҥхо декадата сэтинньи ый 25 күнүттэн ахсынньы 5 күнүгэр диэри ыытыллыаҕа. Декада чэрчитинэн олоҥхоһуттарбытыгар анаан оскуолаларга кылаас чаастара, куйаар ситимин нөҥүө олоҥхону толорооччуларга «Оллоонноон олорон олоҥхолуох» аһаҕас күөн-күрэс, ”Олоҥхо дьоруойдара – мин харахпынан» уруһуй күрэҕэ, олоҥхо ырыатыгар-тойугар маастар -кылаастар, «Олох эргиирэ» онлайн-бырайыак радионан биэриитэ, ону тэҥэ улуустааҕы «Олох суола» хаһыакка анал балаһа тахсыахтара..
Декаданы үөрүүлээх арыйыыга «Ыллык” түмсүү биир дойдулаахпыт Прокопий Прокопьевич Максимов «Ала Хотой аттаах Алтан Дьааһын бухатыыр» олонхотуттан быһа тардыыны толорон дьон биһирэбилин ылла.
Түмүккэ мустубут дьон ийэ олоҥхоһут, тойуксут, алгысчыт Василий Осипович Каратаевка – Харатай Баһылайга сүгүрүйэн туран, кини өйдөбүнньүк мэҥэ бэлиэтигэр сибэкки дьөрбөтүн уурдулар.
Сүүһүнэн сылларга күүһүн-уоҕун сүтэрбэтэх саха норуотун биир сүдү баайын – олоҥхобутун сайыннаран уонна сөргүтэн кэлэр көлүөнэҕэ хаалларыы — биһиги ытык иэспит.
Саллар саас тухары
Саханы үрдэтиэ олоҥхо:
Кэс тылбыт кэскилин көрдөрүө,
Кэхтибэт кэрэтин сөхтөрүө.
Yүнэ — сайда тур, саха кутун туппут Олоңхобут барахсан!
