От ыйын 8-с сайыҥҥы мааны күнүгэр М.Н.Жирков аатынан культура дыбарыаһыгар кырачаан оҕолорун көтөхпүт, батыһыннарбыт, оттомноох орто саастаах, тайахха тэптэрэн да кэлбит ытык кырдьаҕас дьон бырааһынньыктыы киэргэнэн тоҕуоруһа муһуннулар.
Бу Дьиэ кэргэҥҥэ таптал, бэриниилээх буолуу күнэ, сылтан сыл суолтата улаатан, ис хоһооно кэҥээн, быйыл судаарыстыбаннай суолталаах бырааһынньык күнүн быһыытынан бигэргэннэ. Үөрүүлээх күнүнэн улуус баһылыга С.Н.Винокуров улуус бастыҥ-мааны дьиэ кэргэттэрин эҕэрдэлээтэ. Ыал буолан 50 сылларын бииргэ олорор Хампа олохтоохторугар Виталий Николаевич, Варвара Алексеевна Степановтарга “За любовь и верность” Россия мэтээлин туттарда.
Үтүө үгэстэри тэнитэр, ыччаттарыгар иитэр-иҥэрэр, Ийэ, Аҕа тус үлэлэринэн, олоххо көхтөөх сыһыаннарынан дьоҥҥо сэргэҕэ холобур буолар дьиэ кэргэттэри үлэлиир тэрилтэлэрин салайааччылара, аймах билэ дьонноро кэлэн эҕэрдэлээн үөрүүлэрин үрдэттилэр. Үрүҥ көмүс сыбаайбалаах Егор, Марианна Прокопьевтар Мендельсон вальсыгар уйдаран, илии баттаан, улуус саахсатын бочуоттаах кинигэтигэр киирдилэр. 1989 сыллаахха бу күн ыал буолбут Марина, Николай Мякишевтар соһуччу эҕэрдэ тутан долгуйдулар.
Оройуон сэбиэтин бэрэссэдээтэлэ Г.С.Корякин, үлэҕэ уонна социальнай сайдыыга улуустааҕы тэрилтэ салайааччыта А.А.Каратаева, оройуон дьахталларын сүбэтиттэн М.П.Спиридонова дьиэ кэргэн хас биирдии киһиэхэ олоҕун сүрүн сыаннаһа буоларын бигэргэтэн туран истиҥ эҕэрдэлэрин анаатылар.
Саалаҕа мустубут дьон С.Омоллоон аатынан Опера уонна балет театрын солистката Мотрена Семенова, “Сулус суһума ” айар бөлөх ырыаһыттарын эҕэрдэлэригэр уйдаран, бырааһынньык сырдык эйгэтигэр, таптал сылаас иэйиитигэр долгуйа куустардылар….
Бу күн Олоҥхо дьиэтигэр эмиэ общественнай түмсүүлэр бырааһынньыктааҕы тэрээһиннэрэ ыытылынна. Кэлбит дьон итии чэйдээх остуол тула олорон ирэ-хоро кэпсэтэн, эҕэрдэлэһэн тарҕастылар.
Бүлүүбүт бары дьиэ кэргэттэригэр чэгиэн доруобуйаны, бигэ туруктаах нус-хас олоҕу, уостубат тапталы, сирдээҕи олох бары кэрэтин, сиэдэрэйин, баҕарабыт !
