Улуу Кыайыы хас сылын аайы Аҕа дойдуну көмүскүүр Улуу сэриигэ Кыайыыны аҕалсыбыт хас биирдии Бүлүү олохтооҕун аатыгар сүгүрүйэбит, ахтан-санаан ааһабыт.
Ыам ыйын 8 күнүгэр Аҕа дойдуну көмүскүүр Улуу сэрии кыттыылааҕа, Саха АССР норуотун хаһаайыстыбатын үтүөлээх үлэһитэ, Ньурба улууһун Акана нэһилиэгин, Бүлүү куоратын, уонна Бүлүү улууһун бочуоттаах гражданина Афанасий Иннокентьевич Николаев олорбут дьиэтигэр Мэҥэ Бэлиэтигэр сибэкки дьөрбөтүн ууруу сиэрэ-туома ыытылынна.
Афанасий Иннокентьевич дьоҥҥо холобур буолар үтүөкэннээх олоҕу олорбута. Кини — учуутал, буойун, биллэр-көстөр сэбиэскэй-партийнай үлэһит, общественнай деятель, уостапка полковнига этэ. Дойдутугар, дьоҥҥо-сэргэҕэ кэрэхсэнэр, кэнчээри ыччакка холобур дьоһуннаах олоҕу олорбута. 18 сыл Бүлүү улууһун бэтэрээннэрин Сэбиэтин салайбыта. Аҕа дойдуну көмүскүүр Улуу сэрии кыттыылаахтарын хас биирдиилэрин аатын үйэтитиигэ сүҥкэн суолталаах үлэни оҥорбута. Бүлүү улууһун 3 чаастаах “Память” кинигэни хомуйан бэчээккэ таһаарсыбыта. Афанасий Иннокентьевич быһаччы кыттыытынан 1995 сыллаахха Улуу Кыайыы 50 сылыгар Саха сиригэр бастакы “Албан Аат музейа” аһыллыбыта, Бүлүү үс хорсун буойуннарыгар Советскай Союз Геройун аата иҥэриллибитэ.
Афанасий Иннокентьевич туһунан үтүө өйдөбүллэрин «Бүлүү улууһа (оройуона)» муниципальнай оройуон баһылыга Сергей Николаевич Винокуров, Бүлүү куоратын баһылыгын солбуйааччы Николай Варламович Иванов, Афанасий Иннокентьевич Николаев аатынан Албан Аат музейын сэбиэдиссэйэ Клара Егоровна Саввинова, Афанасий Иннокентьевич уола Россия үтүөлээх, Саха сирин үтүөлээх архитектора, Саха Республикатын бочуоттаах архитектора Иннокентий Афанасьевич Николаев эттилэр. Муза Сергеева «Синий платочек» ырыаны бэлэхтээтэ.
Афанасий Иннокентьевич Николаев сырдык аатын кэриэстээн Мэҥэ Бэлиэҕэ сибэкки
дьөрбөтүн уурдубут. Ытык-мааны дьоммутун умнубакка ахта-саныы турарбыт тухары
куораппыт, улууспут историята, кини үтүө-мааны дьонунаата үйэтийэ туруоҕа!
