78 сыл анараа өттүгэр хаһан да өлбөөдүйбэт, хаһан да саппаҕырбат Улуу Кыайыы чаҕылхай, сандаархай, үөрүүлээх күнэ үүммүтэ!
Ыам ыйын 8 күнүгэр М.Н.Жирков аатынан оройуоннааҕы культура Дыбарыаһыгар Улуу Кыайыы күнүгэр аналлаах Бүлүү улууһун уонна Бүлүү куоратын общественноһын үөрүүлээх мунньаҕа буолла.
Саалаҕа дьон мустарыгар урукку кэмнээҕи видео-устуулар көрдөрүлүннүлэр.
Үөрүүлээх тэрээһин М.Н. Жирков аатынан Бүлүүтээҕи оҕо искусствотын оскуолатын народнай оркестрын (сал. Л.Ю. Степанова) доҕуһуолунан “Үргэл” вокальнай ансамбль (сал. Саха Өрөспүүбүлүкэтин үөрэҕириитин уонна култууратын туйгуна М. Н. Лукина), культура сайдыытын уонна норуот айымньытын оройуоннааҕы Киинин “Ай-ыллаа” вокальнай ансамбль (сал. Саха Өрөспүүбүлүкэтин култууратын туйгуна О.Н. Корякина) толорбут ырыаларынан арылынна.
Советскай Союз Геройа Н.С. Степанов аатынан Бүлүү орто оскуолатын эдэр гвардеецтара Андрей Наумов, Николай Николаев, Марк Иванов Кыайыы Кыһыл Знамятын куоппуйатын киллэрбиттэрин мунньах кыттыылаахтара сүһүөхтэригэр туран көрүстүлэр.
Үөрүүлээх мунньаҕы Бүлүү оройуонун депутаттарын Сэбиэтин председателэ Гавриил Семенович Корякин салайан ыытта. Кыайыы күнүгэр аналлаах дириҥ ис хоһоонноох дакылааты Бүлүү улууһун баһылыга С. Н. Винокуров оҥордо. Бүлүү уонна Үөһээ Бүлүү оройуоннарын байыаннай комиссара С.Н. Харлампьев, Бүлүү куоратын баһылыга Я.А.Попов, Свято-Никольскай храм настоятелэ Отец Корнелий, Бүлүү оройуонун бэтэрээннэрин Сэбиэтин председателэ Г.С. Солтуев, Н.Г. Чернышевскай аатынан Бүлүүтээҕи профессиональнай-педагогическай колледж студена Харысхан Дмитриев эҕэрдэлээтилэр.
Биир дойдулаахтарбыт Аҕа дойдуну көмүскүүр Улуу сэрии кыттыылаахтара, Ытык дьоммут К.Е. Павлов Дьокуускайтан, Н.И. Афанасьев Бүлүүттэн уонна байыаннай дьайыыга кытта сылдьар Бүлүүбүт уола видеоҕа устан ыыппыт эҕэрдэлэрэ экраҥҥа көрдөрүлүннэ.
Бырааһынньыгы Советскай Союз Геройа Н.С. Степанов аатынан оскуола үөрэнээччилэрэ (салайааччы М.Ф. Михайлова), Н.И. Ылахова аатынан Бүлүүтээҕи НКК «Дьулуур» ааҕааччылар бөлөхтөрө (сал. М.С. Алексеева), культура сайдыытын уонна норуот айымньытын оройуоннааҕы Киинин “Дьоруо” эр дьон вокальнай ансамбла (сал. О.Н. Корякина), Костя Новиков, Вячеслав Попов киэргэттилэр.
Сиргэ сайдыы, дьол-соргу, ил-эйэ кэрэһитэ буолан Улуу Кыайыы күнэ үйэлэр тухары күлүмүрдүү сыдьаайдын, норуот хорсун быһыыта, албан аата көлүөнэттэн көлүөнэҕэ холобур буолан угуйа-ыҥыра туруохтун!
