М.Н.Жирков аатынан культура дыбарыаһыгар Бүлүү улууһугар бу күннэргэ ыытыллар Эдьигээн эбэҥки национальнай оройуонун күннэрин иһинэн барыахтаах культурнай тэрээһиннэргэ бэлэмнэнии саҕаланна. Бэлиэ күннэр Сахабыт Республиката 100 сылыгар уонна Эдьигээн сэлиэнньэтэ төрүттэммитэ 390 сылыгар ананаллар.
Бүгүн дыбарыас киэҥ-куоҥ саалатыгар эбэҥки норуотун үйэлээх ураты үгэстэрин көрдөрөр “Радуга Заполярья” уус-уран оҥоһуктар быыстапкалара туруоруллар. Ону сэргэ оройуон хатыламмат баай историятын кэпсиир кинигэ, хаартыска быыстапкалара тардыллан көрөөччүлэри сэҥээрдиэ. Ыалдьыттар Бүлүү куоратыгар үлэлии турар культура тэрилтэлэригэр сылдьан, ыытыллар үлэни-хамнаһы көрөн, хардарыта билсэн, кэпсэтиһэн тарҕастылар.
Кулун тутар 25 күнүгэр икки оройуон биир идэлээхтэрэ үлэ уопутун атастаһыахтара. Бу күн Дойду үрдүнэн бэлиэтэнэр культура үлэһиттэрин күнүн үөрүүлээх тэрээһиннэригэр кыттыахтара.
Кулун тутар 26 күнүгэр күнүс 16.00 чаастан Эдьигээн талба талааннаахтара «Мит гэрбивун -эвенкил» диэн дьүкээбил суһумнаах ырыа-тойук, үҥкүү, көр-күлүү улахан түһүлгэтин олохтуохтара.
Ити курдук, Бүлүү куоратыгар Россия норуоттарын культурнай нэһилиэстибэлэрин сылыгар ыытыллар дьоһун суолталаах тэрээһиннэр саҕаланнылар.
