Бүлүү куоратын олохтоохторо, куорат оскуолаларын юнармеецтара ыам ыйын 9 күнүгэр Аҕа дойдуну көмүскүүр Улуу сэрии кыттыылааҕын, Саха Өрөспүүбүлүкэтин норуодунай учууталын, Саха сирин
уонна РСФСР оскуолаларын үтүөлээх учууталын, ССРС үөрэҕэриитин туйгунун,
Өрөспүүбүлүкэ Ытык Аҕатын, Бүлүү улууһун Бороҕон нэһилиэгин, Бүлүү улууһун бочуоттаах гражданинын Николай Иванович Афанасьевы олорор дьиэтин тиэргэнигэр эҕэрдэлии, чиэстии, махтана кэллилэр.
Николай Ивановиһы Бүлүү улууһун баһылыга С.Н. Винокуров, Бүлүү куоратын баһылыга Я.А. Попов, үөрэнээччилэр эҕэрдэлээтилэр.
Советскай Союз Геройа Н.С. Степанов аатынан Бүлүүтээҕи орто оскуолатын үөрэнээччилэрэ (сал. М. Ф. Михайлова) уонна учууталларын триота (сал. СР култууратын туйгуна Е.Туласынова, СР култууратын үтүөлээх үлэһитэ И.Туласынов), Наталья Жиркова ырыаларын, Оройуоннааҕы култуура сайдыытын уонна норуотун сайдыытын «Алгыстаана» (сал. О.Павлова) «Синий платочек» үҥкүүнү бэлэхтээтилэр.
Николай Иванович Афанасьев долгуйан туран Кыайыы күнүнэн эҕэрдэлээтэ, бу күҥҥэ тиийбэтэх доҕотторун, үөлээннээхтэрин туһунан киэн тутта, харааста аҕынна уонна үгэс курдук Бүлүү ыччатыгар Кэс тылын анаата.
Күндү Николай Иванович! Эйиэхэ Ытык киһиэхэ, Буойуҥҥа, Учууталга кэнчээри ыччаппыт үйэлэр тухары махтаныа, Эйигинэн киэн тутта туруо. Оҕолоруҥ, сиэннэриҥ сылаас тапталларыгар угуттанан, бар дьонуҥ үрдүк сыанабылынан, ытыктабылынан кынаттанан доруобай буоларгар, өссө да уһуннук олороргор баҕарабыт!
