диэн бэргэнник этэн турар ССРС народнай учуутала, РСФСР уонна Саха АССР оскуолаларын үтүөлээх учуутала, Саха Республикатын Өксөкүлээх Өлөксөй аатынан Государственнай бириэмийэтин лауреата, Михаил Андреевич Алексеев.
Бүгүн, ыам ыйын 5 күнүгэр, Сахабыт сиригэр физико-математическай хамсааһыны төрүттээн ыччаты үөрэтиигэ сүдү кылаатын киллэрбит учуутал, Бүлүү улууһун Ытык киһитэ Михаил Андреевич төрөөбүтэ 105 сылын туолла.
Бу бэлиэ күнү бэлиэтээн республика үрдүнэн Норуот учууталыгар анаммыт физика уруоктара, кылаас чаастара, өйдөбүнньүк тэрээһиннэр ыытылыннылар.
Төрөөбүт-үөскээбит Бүлүүтүгэр, М.Н.Жирков аатынан оройуоннааҕы культура дыбарыаһыгар, Михаил Андреевич ыччаты политехническэй үөрэххэ сыһыарар ыра санаата туолбутун туоһута- улуус үөрэнээччилэрин уонна оскуола иннинээҕи саастаах оҕолорун сонун бырайыактарын быыстапката турда.Араас оонньууртан, үөрэнэр, үлэни чэпчэтэр техническэй аныгы маллартан көтөр ракетаҕа тиийэ эгэлгэ бэйэлээх оҥоһуктар дьон кэрэхсэбилин ыллылар.
Үөрүүлээх мунньахха мустубут М.А.Алексеев биир дойдулаахтарын Республика Ил Дархана А.С.Николаев, Үөрэх министерствотыттан Л.Б.Тен куйаар ситиминэн эҕэрдэлээтилэр. Улуус баһылыгын солбуйааччы А.А.Прокопьев эҕэрдэтин сэргэ бастыҥ үлэлээх үөрэх үлэһиттэригэр республика, улуус үрдүк наҕараадаларын туттарда.
Культура сайдыытын уонна норуот айымньытын оройуоннааҕы киинэ бэлэмнээн таһаарар “Бүлүүлүүн ситимнээхтэр- умнуллубат ааттаахтар” радиобиэриитэ бу күн Норуот учууталыгар ананан таҕыста. Студияҕа М.А.Алексеев аатын сүгэр Баппаҕаайы орто оскуолатын директора В.В.Макаров, учуутал А.Н.Шамаева, 1969-1970 сылларга үөрэппит ыччата, РФ бочуоттаах радиһа Д.Т.Иванов Ытык киһи дьоҥҥо анаабыт эндирдээх олоҕун, үлэтин, үрдүк аатын үйэтитии туһунан истээччилэргэ кэпсээтилэр.
Михаил Андреевич «Учуутал — күн курдук сырдыгы, сылааһы биэрэр киһи» диэн этиитэ киниэхэ бэйэтигэр анаммыт курдук.. Кэлэр кэми алҕаабыт,
кэскил төрдүн салайбыт биир дойдулаахпыт үтүө аата үйэлэргэ ааттана туруо!
