Тохсунньу 25 күнүгэр Бүлүү куоракка II гильдиялаах атыыһыт, уокурукка биллибит меценат, үөрэҕирии попечителэ Н.А. Расторгуев сиэнэ, «Вилюйский Ротшильд» кинигэ ааптара Николай Елисеевич Томскай уонна хос сиэнэ Канада, Россия гражданина Андрей Викторович Дуглас И.М. Гоголев-Кындыл аатынан народнай театр режиссера, Саха Республикатын культуратын үтүөлээх үлэһитэ М.А.Соколова Бүлүү куоратын үбүлүөйүгэр анаан Расторгуев туһунан документальнай киинэни устар бырайыагын чэрчитинэн ыалдьыттаатылар.
Почетный благотворитель
Ыалдьыттары куорат дьаһалтатыгар баһылыгы солбуйааччы А.П. Иванова, куорат депутаттарын Сэбиэтин бэрэссэдээтэлэ С.М. Саввинова көрүстүлэр, үбүлүөйгэ бэлэмнэнии туһунан, онон сибээстээн Расторгуев аатынан «Почетный благотворитель» диэн түөскэ иилиллэр бочуотунай бэлиэ Балаһыанньата бигэргэтиллибитин билиһиннэрдилэр.
Бүлүү хаһааҕын уһаайбатыгар
Культура управлениетын специалиһа Н.Н. Иванова «Эргэ куорат устунан…» экскурсионнай маршрутунан С.М. Саввинованы кытта куорат историческай бэлиэ миэстэлэринэн сырытыннардылар. Ыалдьыттарбыт Ленин болуоссатыгар оҥоһуллубут саҥа стелланы кэрэхсээтилэр. Расторгуев муостатыгар, реконструкциялана турар «Бүлүү хаһааҕын уһаайбатыгар», урукку Расторгуев атыытын комплексыгар (билигин ЦНТТУ), кыраайы үөрэтэр музейга сырыттылар.
Салгыы Олоҥхо Дьиэтигэр ыалдьыттары үөрүүлээх быһыыга-майгыга көрсүһүү буолла. Куораппыт үйэлээх культуратын көрдөрүүнү «Алгыс» СК специалистара үрдүк таһымнаахтык тэрийдилэр. Алгысчыт Е.Д.Петрова аал уотун айах тутан ыалдьыттары арчылаата, «Ыллык» түмсүү (сал. В.С. Николаев) алаадьынан айах туттулар. Көрдөрүүнү сиэдэрэйдик симэммит Бүлүү символлара Тойон Бүлүү, Бүлүү Хотун, Таба Хотун, Хомус Хотун киириилэрэ саҕалаата.
Бүлүү долгуннара
«Бүлүү долгуннара», В.О. Каратаев аатынан олоҥхо, Кындыл аатынан театр народнай коллективтара, Бүлүүтээҕи хаһаактар хордара, «Гармония» вокальнай коллектив кыттыыны ыллылар, талааннарынан ыалдьыттар биһирэбиллэрин ыллылар.
Культураҕа, ыччат уонна дьиэ кэргэн политикатыгар управление начальнига А.А. Дашевская, А.В. Дугласка, М.Н. Жирков үбүлүөйүгэр тахсыбыт фотоальбомҥа тус бэйэтин архыыбыттан Канадаттан ыыппыт сэдэх хаартыскаларын иһин махтанна. Ыалдьыттарга Махтал Суруктары туттарда.
Улуустаа5ы культура управлениета
