Саха АССР төрүттэммитэ 100 сылыгар анаан Бүлүү улууһун Тааһаҕар нэһилиэгэр бэс ыйын 5 күнүгэр тимир уһаарыыта үрдүк таһымнаахтык ыытылынна. Арыылаах нэһилиэгиттэн Саха Өрөспүүбүлүкэтин норуотун маастара, аан дойду таһымнаах хомус ууһа, Саха сирин тимир уустарын Ассоциациятын актыыбынай чилиэнэ Иван Тимофеевич Павлов -Утум Уус салайааччы, уһуйааччы быһыытынан саха төрүт дьарыгын тимири уһаарыыны сөргүтүүгэ, сайыннарыыга улахан болҕомтотун ууран үлэлиир маастар. Уһуйааччы Иван Павлов-Утум Уус үөрэнээччитигэр Тааһагар нэһилиэгин төрүт олохтооҕо Шамаев Николай Михайлович көҕүлээһининэн, кини дьиэтин тиэргэнигэр уһаарыы ыытылынна. Уһаарыыга улахан интириэс үөскээн олохтоох оскуола технологияҕа учууталлара Иван Николаевич Осипов, Эдуард Николаевич Андреев уонна Уус кыһатын уһуйуллааччылара Айысхан Андреев, Никита Нахов уо д.а. кытыннылар. Бу күн 33 кг рудаттан уһааран 7 кг.тимир болгуону ылан кыттыбыт дьон, Тааһаҕар нэһилиэгин олохтоохторо үөрдүлэр-көттүлэр. Уһуйааччы, тимир ууһа Иван Тимофеевич Павлов -Утум Уус сүбэлээн-амалаан, көрдөрөн саха омук төрүт дьарыга, былыргылыы тимир уһаарыы ньымата сөргүтүллэригэр бар дьоммут сэмэй кылааттарын киллэрдилэр. Бүлүү улууһун тимир уустара, ити курдук, утумнааччыларыгар, көлүөнэттэн көлүөнэҕэ төрүт дьарыгы чөл, тыыннаах хаалларыыга утумнаахтык, дьаныһан үлэлээн, үрдүктэн үрдүк ситиһиилэргэ тиийэн истиннэр!
«Бүлүү улууһа (оройуона)» МО «Оройуоннааҕы культура сайдыытын уонна норуот айымньытын киинэ» МБКТ ИМО отдела
