Олунньу ый 16 күнүгэр В.О. Каратаев аатынан Олоҥхо дьиэтигэр төрөөбүт тыл уонна сурук-бичик күнүн чэрчитинэн «Саха остуоруйатын алыптаах эйгэтэ» диэн саха остуоруйаларын уус-уран ааҕыыга улахан дьоҥҥо күрэх буолан ааста. Бу күн сээркээн сэһэнньиттэр, остуоруйаһыттар, сахабыт фольклорун өрө тутааччылар, остуоруйаны сэҥээрэн истээччилэр тоҕуоруһа муһуннулар. Күрэххэ 10 кыттааччы остуоруйа кэрэ дойдутугар айаннатан араас дьиктилээх-дьиибэлээх, кэрэхсэбиллээх остуоруйалары бэрт сэргэхтик кэпсээтилэр, дьон сэҥээриитин ыллылар. Остуоруйаһыттар кэпсиир кэмнэригэр муусуканан доҕуһуолу, саҥа технологияны экраны туһананнар кэпсиир остуоруйаларын хартыыналарын көрдөрөннөр көрөөччү интэриэһин өссө күүскэ тартылар.
Дьүүллүүр сүбэҕэ үлэлээтилэр: Иванова Алена Алексеевна – Оройуоннааҕы культура уонна норуот айымньытын сайдыытын Киинин уус-уран салайааччыта, Лебедева Матрена Николаевна – В.О. Каратаев аатынан Олоҥхо дьиэтин фольклорга специалиһа, Томская Мария Петровна – Бүлүү улууһун общественнай түмсүү салайааччыта.
Дьүүллүүр сүбэ түмүгүнэн 3 бастыҥ остуоруйаһыты быһаарда. Ол курдук бастакы үрдэли Егорова Мираида Валерьевна «Таал-таал эмээхсин», иккис үрдэли Яковлева Анна Васильевна “Биэс ынахтаах Бэйбэрикээн эмээхсин”, үһүс үрдэли Дмитриева-Ажигалова Мария Васильевна «Эһэни бултааһын» ситистилэр. Кыттааччылар бары туоһу суругунан, кыайыылаахтар добун суругунан уонна сыаналаах бириистэринэн наҕараадаланнылар.
Күрэх түмүгэр саха төрүт үҥкүүтүн оһуокайы оройуттан тутан арчыланныбыт, күүспүтүгэр күүс, сэниэ эбиннибит.
Бу тэрээһини сахалыы таҥастарын кэтэн кэлэн киэргэппит, остуоруйаны сэҥээрэн истибит Н.С. Степанов аатынан Бүлүүтээҕи 3 нүөмэрдээх орто оскуола 5 “е” кылааһын үөрэнээччилэригэр, кылаас салайааччыта Галина Александровна Анисимоваҕа барҕа махталбытын тиэрдэбит!
