Кулун тутар 27 күнүгэр – Аан дойдутааҕы театр күнүгэр – Н.И. Ылахова аатынан “Алгыс” национальнай-культурнай Киин И.М.Гоголев аатынан Бүлүүтээҕи народнай театрын режиссера, киэҥ нэлэмэн Сахабыт сиригэр уонна Россияҕа тиийэ биллэр-көстөр талааннаах киһибит Саха Республикатын культуратын үтүөлээх үлэһитэ Маргарита Соколова туруоруутугар биир дойдулаахпыт Аҕа дойдуну көмүскүүр Улуу сэрии кыттыылааҕа, Ленин уонна Үлэ Кыһыл Знамята уордьаннар кавалердара, РСФСР үтүөлээх учуутала, сахалартан соҕотох ССРС норуодунай учуутала Михаил Андреевич Алексеев туһунан «Төлөннөөх сүрэх” спектаклын премьерата үгүс көрөөччүлээх, уҕараабат ытыс тыаһа доҕуһуоллаах буолан ааста.
Бу спектакль Сахабыт сирин автономиятын 100 сылын чэрчитинэн улууспутугар биллэриллибит Бүлүү чулуу дьонугар аналлаах сылга турбута дьоһун суолталаах.
Михаил Андреевич Алексеев оруолун культура сайдыытын уонна норуот айымньытын оройуоннааҕы Киинин специалиһа САМУИЛ ИВАНОВ итэҕэтиилээхтик толорон көрөөччүлэр биһирэбиллэрин ылыан ылла.
Спектакльга өссө тэрилтэбит специалиһа НЬУРГУН ГАВРИЛЬЕВ биир оруолу ситиһиилээхтик оонньоото.
Бу дьоро киэһэҕэ М.А. Алексеев төрөппүт уола Михаил Михайлович Алексеев,төрөөбүт Баппаҕаайытын нэһилиэгин баһылыга Е.А. Николаев, үөрэнээччитэ СР Судаарыстыбаннай Мунньаҕын депутата И.И. Шамаев, общественнай деятель Н.Д. Архипов, Үөһээ-Бүлүү улууһун делегацията ыалдьыттаатылар.
Бүлүү улууһун баһылыга С.Н. Винокуров, культура сайдыытын уонна норуот айымньытын оройуоннааҕы Киинин отделын сэбиэдиссэйэ Н.Н. Иванова кыттыыны ыллылар, режиссер Маргарита Соколованы уонна спектаклга кыттыбыт артыыстары эҕэрдэлээтилэр, махтаннылар.
Маргарита Алексеевна улуус патриотун, культура деятелин уонна режиссер быһыытынан Михаил Андреевич сырдык аатын кэриэстээн, сүгүрүйэн, үйэтитэн туруорбут айымньыта Улахан учуутал олорбут ураты уонна уустук дьылҕатын билиҥҥи кэм дьонун, кэнчээри ыччат билиитигэр-көрүүтүгэр таһаарбыта Бүлүү культуратын, норуот театрын историятыгар хаалар үрдүк аналлаах.
