И.М.Гоголев -Кындыл аатынан улуустааҕы кииннэммит библиотечнай ситим ыччат библиотекатыгар Төрөөбүт тыл уонна сурук-бичик Күнүн, Бүлүүгэ бастакы норуот библиотеката аһыллыбыта 125 сылын чэрчитинэн үлэ бэтэрээнэ, СӨ суруйааччыларын Союһун чилиэнэ, СӨ культуратын туйгуна, Бүлүү куоратын Өрөгөйүн ырыатын (Гимнин) тылын ааптара НИКОЛАЙ ИВАНОВИЧ ИВАНОВ «Баҕарабын киһи өйө бу сир күөҕүн харыстыаҕар…» диэн хоһооннорун саҥа хомууруунньугун билиһиннэрии буолла. Көрсүһүүгэ Бүлүү эдэр көлүөнэтэ, И.Л.Кондаков аатынан Бүлүүтээҕи гимназия, Советскай Союз геройа Н.С. Степанов, Г.И. Чиряев аатынан оскуолалар үөрэнээччилэрэ, ыччаттар сылдьан кэрэхсээтилэр. Кинигэни библиотека Чернышевскайдааҕы салаатын сэбиэдиссэйэ, СӨ культуратын туйгуна Л.П. Корякина билиһиннэрдэ. Улуус баһылыгын социальнай политикаҕа солбуйааччыта А.А.Прокопьев, Чернышевскай нэһилиэгин бэтэрээннэрин «Ыллык» түмсүүтүн салайааччыта Р.П.Сортоева, куорат дьаһалтатын (баһылык Я.А. Попов) уонна библиотека коллективын аатыттан библиотека директора, куорат Сэбиэтин бэрэссэдээтэлэ Н.Н. Харлампьев, «Алгыс» НКК специалиһа М.С.Алексеева эҕэрдэлээтилэр.
Суруйааччы хоһооннорун культура сайдыытын уонна норуот айымньытын оройуоннааҕы Киинин специалистара Ольга Корякина, Алена Иванова, Надежда Корякина, Александр Иванов, Чинэкэттэн Анна Семенова аахтылар. «Дьулуур» бөлөх ааҕааччыта Айвар Прокопьев «Эһигини салгыыр дьоммут» хоһоону олус иэйиилээхтик ааҕан ытыс дохсун тыаһынан кэрэхсэннэ. Николай Иванович тэрийээччилэргэ, кыттааччыларга махтанна, оҕолору кыра саастарыттан сахалыы тыыннаах, сахалыы саҥалаах төрөөбүт дойду патриота буола улааталларыгар алҕаата.
