Олунньу 13-28 күннэригэр Уус кыһатын дьиэтигэр «Сиэдэрэй иис умсулҕана» V улуустааҕы аһаҕас быыстапка-күрэх буолан ааста. Бу быыстапка-күрэҕи ыыттылар: «Өбүгэ утума» олохтоох общественнай тэрилтэ (салайааччы Леонтьева Виктория Алексеевна), Культура сайдыытын уонна норуот айымньытын оройуоннаҕы киинэ. Бүлүү улууһун араас нэһилиэктэриттэн 66 киьи кытынна, 241 экспонат-үлэ турда. Быыстапка кэмигэр маастар-кылаастар, дьаарбаҥкалар ыытылыннылар. Төгүрүк остуолга иистэнньэҥнэр, норуот маастардара бэйэлэрин санааларын үллэһиннилэр, былааннарын этиннилэр.
Быыстапка-күрэх түмүгүнэн дьүүллүүр сүбэ 3 бастыҥнары быһаарда:
Бастакы миэстэ – «Утум ситимэ» түмсүү, Халбаакы нэһилиэгэ
Иккис миэстэ – «Салама» түмсүү, Балаҕаччы нэһилиэгэ
Үһүс миэстэ – Васильева Раиса Петровна, Тылгыны нэһилиэгэ
15 иистэнньэҥҥэ анал ааттар иҥэрилиннилэр. Кыттааччылар бары туоһу суруктарынан, кыайыылаахтар добун суруктарынан уонна сыаналаах бириистэринэн наҕараадаланнылар.
«Сиэдэрэй иис-умсулҕана» V улуустааҕы аһаҕас быыстапка-күрэх уран тарбахтаах талааннаахтарыгар, кыттыылаахтарыгар өссө төгүл махтанабыт, айар тутар үлэлэригэр салгыы саҥа ситиһиилэри баҕарабыт.
