Бүлүү улууһугар Хомус нэдиэлэтэ сэтинньи ый 30 күнүттэн ахсынньы ый 7 күнүгэр диэри бэлиэтэнэр.
Бүгүн хомус нэдиэлэтин үөрүүлээх арыллыытыгар, сэтинньи 30 күнүгэр күнүс 15.00 чаастан Саха Өрөспүүбүлүкэтин үтүөлээх артыыһа, биир дойдулаахпыт виртуоз-хомусчут Альбина Дегтярева кыттыылаах куйаар ситимин нөҥүө (zoom), хомус алыптаах дорҕоонугар угуттанан, хомуһу күргүөмүнэн тардыы тэрээһинэ бэрт сэргэхтик буолан ааста.
Тэрээһин саҕаланыыта Оройуоннааҕы култуура уонна норуот айымньытын сайдыытын киинин салайааччыта Алена Александровна Дашевская хомус күнүнэн эҕэрдэлээтэ уонна хомуһу сэҥээрээччилэри күргүөм хомуһу тардыыга ыҥырда.
Хомус нэдиэлэтин арыллыытыгар барыта 51 киһи кыттыыны ыллылар. Дьокуускайтан , Кыргыдайтан, Чинэкэттэн, Дьөккөнтөн, Бүлүүттэн култуура иһинэн үлэлиир «Ыллык» түмсүү, «Дорҕоон» фольклорнай бөлөх, Бүлүүтээҕи алын сүһүөх, орто оскуола үөрэнээччилэрэ, Бүлүүтээҕи 2-с нүөмэрдээх алын сүһүөх оскуолатын 3 «в» кылаас оҕолоро, кылаас салайааччыта Петрова Наталья Романовна.
Альбина Михайловна кэнниттэн күргүөм тардыыны салҕаатылар Семенова Айталина Петровна – М.Н. Жирков аатынан
Бүлүүтээҕи оҕо искусствотын оскуолатын Чернышевскайдааҕы филиал сэбиэдиссэйэ, Дмитриев Айаал Ильич — Дьөккөн нэһилиэгин «Сарыал” култуура киинин дириэктэрэ, “Хомусчаан” уонна “Хомуһун” фольклорнай бөлөх салайааччыта.
Хомус барахсан угуйар тойуга өрүүтүн үрдүккэ кынаттыы, ыҥыра туруохтун,
Бүлүү хомуһун үйэлээх үгэстэрэ салҕана, сайда турдун!
