Саха народнай суруйааччыта, Саха Республикатын культуратын үтүөлээх үлэһитэ, В.Е.Васильев-Харысхал суруйууларын аахпатах киһи аҕыйах буолуо. Биллиилээх драматург пьесаларын биллиилээх режиссердар Федот Потапов, Андрей Борисов, Василий Фомин П.А.Ойуунускай аатынан Саха академическай театрыгар туруорбуттара. Олор истэригэр “Амма5а саас этэ”, “Сэрии тыйыс тыына”, “Кэт Марсден. Үтүө санаа аанньала”, “Көмүөл” онтон да атыттар.
Бу маннык саха норуотун уустук дьылҕатын кэпсиир спектакльларга театр саалата мэлдьи толору буолар.
Онтон бу, сэтинньи 11 күнүгэр Бүлүүтээҕи И.М.Гоголев-Кындыл аатынан народнай театр Баһылай Харысхал “Сэрии тыйыс тыына” 4 чаастаах пьесатын туруорда. Дойдубутугар бу уустук, олус эппиэтинэстээх кэмҥэ режиссер, Саха Республикатын культуратын үтүөлээх үлэһитэ, Маргарита Алексеевна Соколова туруоруутугар тахсыбыт пьеса ордук долгутуулаах буолла….
Бастаан, Н.И.Ылахова аатынан «Алгыс» культура национальнай киинин саалатыгар толору мустубут дьон, сэриини утарар ис хоһоонноох уус-уран ааҕыыттан, патриотическай тыыннаах ырыалартан таҥыллыбыт композицияны (Туруорааччы Саха Республикатын культуратын туйгуна М.И.Иванова) иһийэ чуумпуран көрдүлэр.
Салгыы кыһыл баархат быыс аһыллан спектакль саҕаланар…Сцена ис бараана оччотооҕу бириэмэни көрдөрөрдүү оҥоһуулаах. Бииртэн биир сэрии тыынын көрдөрөр хартыыналар көстөллөр: Алаастарыгар хаалбыт ийэлэр аймалҕаннара, аҥардас дьахталлар санныларыгар сүктэриллибит ыарахан үлэ, былаас бэриниилээх бэрэстэбиитэлин хаҕыс сыһыана, оҕолорун аччыктаан өлөртөн быыһыыр туһугар сирэйдэрэ-харахтара турбут ийэлэр….. Итиннэ барытыгар кыһарҕаннаах олохтон ыгыллыбыт өй-сүрэх мөккүөрэ баара арылхайдык көстөр.
Хайдахтаах да киһи маны көрөн олорон долгуйбат, уйадыйбат буолуон сатаммат. Сэрииттэн кэлэр хас биирдии сурук самнайбыт саха балаҕаныгар аҕалар алдьархайа, эдэркээн кыыс ыарыыттан өрүттүбэккэ быстах дьылҕаланара, көмүс чыычаахтарын сүтэрбит ийэлэр дууһаларын кыланыыта- көрөөччү хараҕын уутун ыган таһаарар ыарахан түгэннэр.
Маны барытын театр артыыстара итэҕэтиилээхтик оонньоон сэрии тыйыс тыынын чахчы көрөөччүлэргэ тиэртилэр. Сүрүн оруол Огдооччуйа эмээхсини Саха Республикатын культуратын үтүөлээх үлэһитэ М.С.Васильева олус табыллан толордо. Марфа Спиридоновна эргиччи талааннааҕын бу да сырыыга бигэргэттэ. Аҥардас тылын, саҥатын күүһэ айымньы ис хоһоонун арыйарга дылы. Саха Республикатын культуратын туйгуннара, театр биир тутаах артыыһа Л.Леонтьева (Булчут Балбаара), уопуттаах артыыстар Н.А.Афанасьев (Туруукап), М.С.Алексеева (Настаа), М.И. Иванова (Мотуруона), А.А.Иванова (Өксүү) оонньуулара ситэри –хотору. Саҥа саҕалаан эрэр Надежда Корякина (Кылаанньа), Платон Стрекаловскай (Дьарааһын) уустук оруоллары толору арыйбыттара кэрэхсэбиллээх. Онтон саамай кырачаан артыыстары туһунан тутан хайгыахха эрэ сөп. Бүлүү куоратыттан гимназия 5 кылааһын үөрэнээччитэ Айвар Прокопьев сүрүн оруолу толордо диэххэ сөп. Спектакль саҕаланыаҕыттан бүтүөр диэри улахан артыыстары кытары сыанаттан тахсыбакка оонньоото. Театрга оонньуурун ис дууһатыттан сөбүлүүрэ, Мэхээс оруолун олус кыһаллан толороро харахха быраҕыллар, маладьыас. Онтон 1 сүһүөх оскуола 4 кылааһын үөрэнээччитэ Мичийээнэ Иванова кылгас да буоллар, олус суолталаах оруолу- Улуу Кыайыыны аҕалбыт кыысчааны толорон, спектакль түмүгүн ситэрэн-хоторон биэрдэ.
Ити курдук куорат, улуус олохтоохторо бу киэһэ Баһылай Харысхал уоттаах сэрии сылларыгар саха дьонун төлкөтүн кэпсиир айымньытын сатабыллаах режиссер Маргарита Алексеевнабыт туруоруутугар көрөн тарҕастыбыт. Сэрии тыйыс тыына билигин да биһигини долгутара пьеса ис хоһоонун, спектакль суолтатын өссө сытыырхатан биэрдэ. Спектакль музыканан доҕуһуолун Саха Республикатын культуратын үтүөлээх үлэһитэ И.И.Тулааһынап, техническэй өттүн Иван Васильев, Афанасий Афанасьев, Николай Илларионов хааччыйдылар. Театр сүгүрүйээччитэ, Бүлүү Далбар Хотуна Ефросинья Дмитриевна Петрова, үтүө үгэһинэн, сахалыы туттар малынан, иһитинэн-хомуоһунан көмөлөстө.
Народнай театрбыт айар коллективын саҥа туруоруутугар көрсүөххэ диэри!
