Өрөгөйдөөх Кыайыы күнүн көрсө Бүлүү дьоно-сэргэтэ, эдэр ыччата ыам ыйын 7 күнүгэр күн сирин көрдөрөн, көччөх гынан көтүтэн улаатыннарбыт уолаттарын Аҕа дойдубут көмүскэлигэр уоттаах сэриигэ атаарбыт Ийэлэргэ сүгүрүйэн Бүлүү эбэ үрдүк кытылыгар турар Ийэ скверигэр тоҕуоруһа муһуннулар.
Бу ытык миэстэҕэ сэрии толоонугар тыыннарын толук уурбут Бүлүүбүт 1029 хорсун байыаһын, оҕолорун сүтэрэн аймаммыт, харах уутунан сууммут ытык Ийэлэри кэриэстээн улуус баһылыга С.Н.Винокуров, оройуон сэбиэтин председателэ Г.С.Корякин, куорат баһылыгын э.т. Т.Е.Кондакова, куорат сэбиэтин председателэ С.М.Саввинова, А.И.Николаев аатынан Албан аат музейын сэбиэдиссэйэ К.Е.Саввинова, дьахталлар Сүбэлэрин председателэ М.К.Иванова киһи дууһатын таарыйар чахчылары этэн туран тыл эттилэр.
Ураты долгутуулаах, хараастыылаах түгэни Культура сайдыытын уонна норуот айымньытын оройуоннааҕы киинин талааннаах үлэһиттэрэ ис дууһаттан тахсар чаҕылхай сценическэй толорууларынан өссө дириҥник арыйан биэрдилэр. Хас биирдии киһи сүрэҕин кылын таарыйан уйадыттылар.
Мустубут дьон сэрии кэминээҕи ыарахан дьылҕаламмыт Ийэлэр сырдык ааттарын, күндү мөссүөннэрин, олорбут килбиэннээх олохторун, туолбатах ыра санааларын биир мүнүүтэ иһийэн туран кэриэстээтилэр уонна мэҥэ бэлиэҕэ сүгүрүйүү бэлиэтин- сибэккилэри уурдулар.
Ийэ сир, дьол иһин өлбүттэр үйэттэн үйэҕэ тыыннаахтар. Эдэркээн ыччаппыт сэриини билбэтин, эйэлээх халлааан анныгар Ийэлэр харахтарын уута хаһан да тохтубатын!
