Буг өрүс будуллар долгуна…
Байыаспыт — Ньукулай ньургуммут !
Буочука иһиттэн бүлүмүөт уотунан
Суол аһар дьонугар ….
Ыам ыйын 13 күнүгэр М.Н. Жирков аатынан оройуоннааҕы культура дыбарыаһыгар Советскай Союз Геройа Николай Саввич Степанов төрөөбүтэ 100 сылыгар аналлаах Бүлүү улууһун уопсастыбаннаһын үөрүүлээх мунньаҕа ыытылынна.
Өрөгөйдөөх үбүлүөй үөрүүлээх мунньаҕын “Бүлүү улууһа (оройуона)” муниципальнай оройуон депутаттарын сэбиэтин Президиумун чилиэнэ И.И. Алексеев салайан ыытта.
Николай Саввич сэрии будулҕанын туораан, дойдутугар этэҥҥэ эргиллэн, көмүскээбит Ийэ дойдутун чөлүгэр түһэриигэ, сайыннарыыга бары күүһүн ууран үлэлээбитэ. Дьиэ-уот тэринэн, ыччаттанан, биир дойдулаахтарын ортотугар олорон ааспыт ураты дьылҕалаах. Кини эндирдээх олоҕун, бойобуой сырыыларын туһунан дакылааты «Бүлүү улууһа (оройуона)» муниципальнай оройуон баһылыга С. Н. Винокуров оҥордо.
Айылҕа куттаах хорсун буойун Ытык бэлиэ күнүгэр Республика салалтатыттан Правительство Председателин солбуйааччы М.В. Никифоров, ветераннар сүбэлэрин председателэ В.О. Иванов, экологияҕа, айылҕа харыстабылыгар уонна ойуур хаһаайыстыбатыгар министр солбуйааччыта А.Н.Коноплев, СӨ “Якутлесресурс” тэрилтэ генеральнай директора Д.И.Хон, улуус иһиттэн “Тоҕус нэһилиэгэ” МТ баһылыга А.В.Васильев , Советскай Союз Геройа А.А. Миронов аатынан Мастаах орто оскуолатын видеоэҕэрдэлэрэ мустубут дьоҥҥо тиэрдилиннэ.
Мунньахха кыттыыны Николай Саввич кыра кыыһа Акулина Николаевна ылла. Аҕатын аатын үйэтииигэ ыытар үлэни тэрийээччилэргэ махтанан туран, Степановтар дьиэ кэргэттэрэ сыллата олохтуур анал стипендияларын Герой аатынан 3 № орто оскуола 11 кылааһын туйгун үөрэнээччитигэр Виктор Руфовка туттарда. Үтүө үгэскэ кубулуйан сыллата туттарыллар Бүлүүтээҕи ойуур хаһаайыстыбатын коллективын стипендиятын оскуола математикаҕа учуутала С.Т. Типанова ылла.
Эҕэрдэ тыллары «Бүлүү куората» МТ депутаттарын Сэбиэтин председателэ С.М.Саввинова, «Арыылаах нэһилиэгэ» МТ баһылыга А.А.Тимофеев, Н.С.Степанов аатынан Бүлүү к. 3 № орто оскуолатын директора Г.В.Иннокентьев Бүлүүтээҕи ойуур хаһаайыстыбатыттан Э.Ф. Ионов эттилэр.
100 сыллаах үбүлүөйдээх тэрээһин өрө көтөҕүллүүлээхтик, бэрт сэргэхтик ааста. Герой аатынан 3-с нүөмэрдээх орто оскуола эдэр армеецтара байыаннай хаамыы үөрүйэхтэрин көрдөрүүлэрэ, үөрэнээччилэр, учууталлар толорбут хоһоонноро, ырыалара дохсун ытыс тыаһынан доҕуһуолланна.
Николай Саввич турууласпыт эйэлээх олоҕо кэнчээри ыччатынан салҕанарын бигэргэтэн, хос сиэнэ, “Туллукчаан” уһуйаан иитиллээччитэ 5 саастаах Милена Егорова иитээччи Н.Э. Корякина анаан суруйбут хоһоонун чоргуччу аахта.
Албан ааттаах буойун Советскай Союз Геройа Николай Саввич Степановка бар дьон ытыктабыла, сүгүрүйүүтэ бу курдук үйэттэн үйэҕэ салҕана турдун!
