Бүлүүгэ – «Поющее мужское братство» республикатааҕы көрүү-күрэх Олунньу 23 күнүгэр Бүлүү куоратыгар А.Н.Семенов аатынан XV республикатааҕы «Поющее мужское братство» көрүү-күрэх үрдүк таһымнаахтык ыытылынна.
Быйылгы конкурс композитор, РСФСР уонна ЯАССР үтүөлээх деятелэ Грант Григорян төрөөбүтэ 100 сылыгар, «Поющее мужское братство» көрүү-күрэх бастакы тэрийээччитэ, мелодист, саха мелодистарын айымньыларын хомуйан (ырыанньыктары) оҥорооччу, Бүлүү улууһуттан төрүттээх Анатолий Семенов төрөөбүтэ 75 сылыгар уонна Бүлүү куората төрүттэммитэ 385 сылыгар ананан тэрилиннэ.
Бу күрэҕи Саха Республикатын культураҕа уонна духовнай сайдыыга Министерствота, Республикатааҕы норуот айымньытын дьиэтэ, «Бүлүү улууһа (оройуона)» муниципальнай оройуон дьаһалтата, Бүлүү улууһун культураҕа, ыччакка уонна дьиэ кэргэн политикатыгар управлениета, «Бүлүү куорат» муниципальнай тэриллии, «Алгыс» сынньалаҥ Киинэ тэрийэн ыыттылар.
Барыта 12 улуустан 30 эр дьон ансаамбыла кыттыыны ыллылар. Сарсыарда өттүгэр ыалдьыттары Бүлүү улууһун дьаһалтатын актовай саалатыгар улуус баһылыгын бастакы солбуйааччы И.И.Евсеев көрүстэ.
Кини хас биирдии кэлбит ансаамбыл салайааччыларыгар махтанна, ситиһиилэри баҕарда уонна улуус баһылыга С.Н.Винокуров аатыттан Махтал суруктары уонна өйдөбүнньүк бэлэхтэри туттарда.
“Алгыс” сынньалаҥ Киинигэр күрэх үөрүүлээх арыллыытын Бүлүүтээҕи эр дьон хора (салайааччы О.Н. Корякина) уонна Г.С. Донской аатынан оскуола кырачаан ааҕааччы уолаттара (салайааччылар М.С. Алексеева, Т.А.Николаева) өрө көтөҕүллүүлээхтик саҕалаатылар. Хор толоруутугар Бүлүү улууһун Өрөгөйүн ырыатынан (Гимнинэн) көрүү-күрэх арыллыбытынан биллэрилиннэ!
