В.О.Каратаев аатынан Олоҥхо Дьиэтигэр «Олоҥхо — олохпут ситимэ» улуустааҕы күрэх буолла. Күрэххэ 3 бөлөх, 30-ча киһи кыттыыны ылла. Алгысчыт Нюргуяна Саввинова Аал уоттан, Үрдүк Айыылартан көрдөһөн арчылаах Алгыһы түһэрдэ. «Ыллык» түмсүү эбээлэрэ (сал.Владимир Николаев) алаадьынан айах туттулар.
Өрөспүүбүлүкэтээҕи «Ыччат Олоҥхоһут» түмсүү салайааччыта Анастасия Алексеева Эҕэрдэ Суругун Бүлүүтээҕи салаа салайааччыта Капитон Львов аахта. Күрэххэ Чернышевскай, Тааһаҕар, Халбаакы нэһилиэктэрин норуот айымньытын Кииннэрин олоҥхоһуттарын бөлөхтөрө кытыннылар. Бөлөхтөр барылара 37 сааһыгар дылы саастаах эдэр дьон буолан ордук сэргэхтик, сонуннук барда.
Түмүккэ Халбаакытааҕы «Туску» НАДь бөлөҕө (сал.С.Н.Петрова) С.Васильев «Мөҥүрүүр Бөҕө» олоҥхотун толорон III үрдэл, Чернышевскайдааҕы П.П.Николаев аатынан «Кыталык» НАДь бөлөҕө (сал. Л.А.Прокопьева С.П.Протопопова) олохтоох автор «Айыы дьонун көмүскүүр аналлаах Күн Куйаарыма Куо» олоҥхону толорон II үрдэл, Тааһаҕардааҕы «Эйгэ» НАДь бөлөҕө (сал.К.В.Петрова, уһуйааччы Г.П.Алексеева) С.Еремеев — Дэдэгэс «Төбөт Мэник бухатыыр» олоҥхотун толорон I үрдэл хаһаайыннарынан буоллулар.
Анна Семеноваҕа (Чинэкэ) «Олоҥхону суруйааччы», Христина Осиповаҕа (Тааһаҕар) «Олоҥхо бастыҥ сэһэнньитэ», Иннокентий Николаевка (Халбаакы) «Олоҥхо кэскиллээх сэһэнньитэ», Виктория Михайловаҕа (Чинэкэ) уонна Михаил Шамаевка (Тааһаҕар) «Олоҥхо тойугун бастыҥ толорооччу», Владислав Павловка (Халбаакы) «Кэскиллээх олоҥхоһут» анал ааттар ананнылар.
Култуура сайдыытын уонна норуот айымньытын оройуоннааҕы Киинин «Дорҕоон» этно-фольклорнай бөлөҕө , флейтаҕа оонньуур үөрэнээччи Сарыал Васильев уһуйааччыта Надежда Корякинаны кытта хомуска оонньоон кыттааччылары эҕэрдэлээтилэр.
Эдэр олоҥхо толорооччулар быйыл Өймөкөөҥҥө ыытыллар өрөспүүбүлүкэтээҕи Олоҥхо Ыһыаҕар кыттыы туһунан сүбэлэстилэр. Олоҥхо күрэҕин кыттыылаахтара Тааһаҕартан Ким Осипов таһаарбыт оһуокайыгар үҥкүүлээн куттара бөҕөхсүйдэ.
Ытык Бүлүүбүт олоҥхотун үйэлээх үтүө үгэстэрин ыччаттарбыт салгыы, сайыннара турдуннар!
