Оройуоннааҕы култуура сайдыытын уонна норуот айымньытын киинин иһинэн үлэлиир В.О.Каратаев аатынан Олоҥхо Дьиэтигэр бүгүн Олоҥхону сэҥээрээччи, фольклору өрө тутааччы оҕолор муһуннулар. Ол курдук Олоҥхо Дьиэтигэр Кэбээйи улууһун Мастааҕыттан ( салайааччы Сардаана Константиновна Жакипова) уонна Бүлүү улууһун Тааһаҕарыттан ( салайааччылар Ольга Самуиловна Каратаева, Мария Гаврильевна Попова) уопсайа отут оҕо уһуйааччыларынаан кэлэн, »Удьуору утумнаан» диэн ааттаах тэрээһиҥҥэ сырыттылар. Бу тэрээһини Фольклор испэссэлииһэ С.Ө. култууратын туйгуна Николай Афанасьев-Айдаман иилээн-саҕалаан ыытта. Көрсүһүү С.Ө. култууратын туйгуна Владимир Спиридонович Николаев »Ыллык» түмсүүтүн кыттылаахтарын кытта Алгыс түһэриитинэн саҕаланна. Оройуоннааҕы култуура сайдыытын уонна норуот айымньытын киинин салайааччытын э.т. Никита Вячеславович Додутов эҕэрдэтин кэннэ кэлбит уһуйааччылар үлэлэрин хайысхаларын билиһиннэрдилэр, маастар кылаастары бэрсэн уопут атастастылар. Музыкальнай эҕэрдэлэр, олоҥхоттон быһа тардыылар, оһуокай тэрээһини ситэрэн-хоторон биэрдилэр. Эбиэттэн киэһэ И.М. Гоголев — Кындыл аатынан библиотекаҕа, М.Н. Жирков аатынан култуура Дыбарыаһыгар, »Вилюйчане-Государственные деятели Якутии» историческай саалаҕа, Бүлүүтээҕи П.Х. Староватов аатынан Кыраайы үөрэтэр музейга ону сэргэ А.И. Николаев аатынан ,»Албан Аат» музейга сырыттылар. Маннык үтүө туһалаах көрсүһүүлэр өссө да былааҥҥа баар буолуохтарыгар баҕаран туран, доҕордуу сыһыаннаах тарҕастылар. Тэрийсибит уонна кыттыыны ылбыт дьоҥҥо махталбытын тиэрдэбит!
