Олоҥхо – саха норуотун тылынан уус-уран айымньытын үрдүкү чыпчаала, үйэттэн үйэлэр тухары, көлүөнэттэн көлүөнэҕэ бэриллэн иһэр дириҥ баай ис хоһоонноох сүдү айымньыбыт буолар. Улуу олоҥхобутун үйэтитэри, харыстыыры, киэҥ эйгэҕэ таһаарары ситиһэр туһуттан Саха өрөспүүбүлүкэтигэр олоҥхо күнүн чэрчитинэн Бүлүүбүт улууһугар сылын аайы киэҥ далааһыннаахтык Олоҥхо дэкээдэтин биллэрэн араас хабааннаах үрдүк таһымнаах тэрээһиннэр буолаллар. Сэтинньи 19 күнүгэр “Култуура сайдыытын уонна норуот айымньытын оройуоннааҕы киинэ” уонна «Н.И.Ылахова аатынан “Алгыс” национальнай култуура Киинэ” В.О.Каратаев аатынан Олоҥхо дьиэтигэр Бүлүү улууһугар Олоҥхо дэкээдэтин үөрүүлээх аһыллыыта буолла.
Бу күн Үгүлээт нэһилиэгэр олорбут үлэ уонна тыыл бэтэрээнэ, саха үтүө үгэстэрин үйэтиппит Алгысчыт, оһуокайдьыт, хомусчут Харлампьева Феодосия Васильевна төрөөбүтэ 100 сылыгар аналлаах “Алгыстаах оһуокай” улуустааҕы оһуокай күрэҕэ буолан ааста. Манна Бүлүүбүт улууһун талааннаах үҥкүү тылын этээччилэрэ көхтөөх кыттыыны ыллылар. Түмүгэр «Аан Дархан этээччи” үрдүк ааты ситистэ Федора Донская, бастакы миэстэни — Светлана Харлампьева – Сыдьаайа, иккис миэстэни – Чочуттан Мэҥкэр Сэмэн Хабырыыл уола, үһүс миэстэни Николай Афанасьев – Айдаман буоллулар. Бириистэри туруордулар Феодосия Васильевна чугас дьонноро, оҕолоро, аймахтара.
Бу курдук, сэтинньи, ахсынньы ыйдар усталарыгар олоҥхоҕо, хомуска сыһыаннаах араас хабааннаах тэрээһиннэр ыытыллан саҕаланнылар. Манна даҕатан этэххэ сэтинньи 18 күнүгэр М.Н. Жирков аатынан Оройуоннааҕы култуура Дыбарыаһыгар саха төрүт үгэстэрин киэҥ эйгэҕэ таһаарар, саҥа талааннары арыйар, саха фольклорун көрүҥнэригэр көҕүлүүр, төрүт үгэстэри, саха фольклорун илдьэ сылдьар кэрэ аҥардары өрө тутар, кинилэргэ болҕомтону уурар сыаллаах соруктаах Бүлүү улууһугар Олоҥхо декадатын чэрчитинэн ыытыллар «Олоҥхо дойдутун Далбар Хотуна» фольклор көрүҥнэрин толорооччулар икки ардыларыгар күөн-күрэс буолан ааста.
Күрэскэ 40-60 диэри саастаах 7 кыттааччы Бүлүү куоратыттан, Чинэкэттэн, Бастакы Чочуттан, Бороҕонтон, Дьөккөнтөн уонна ыаллыы сытар Кэбээйи улууһун Мастааҕыттан кыттыыны ыллылар. Күрэс түмүгүнэн хас биирдии кыттааччыга анал ааттар иҥэрилиннилэр, кыттыбыттарын иһин туоһу суруктар, дипломнар туттарылынылар, бириистэринэн наҕараадаланылар.
«Олоҥхо дойдутун Далбар Хотуна» Кылаан Чыпчаал (ГРАН-ПРИ) — Парасковья Федорова;
«Иэйии Хотун» — Светлана Харлампьева;
«Мааны Хотун» — Ньургуйаана Саввинова;
«Айыы Хотун» — Марианна Пестрякова;
«Сайдам Хотун» — Анна Семенова;
«Уран Хотун» — Галина Егорова;
«Күбэйэ Хотун» — Люция Сметанина;
«Көрөөччү биһирэбилэ» — Светлана Харлампьева буолла.
Ити курдук Бүлүү улууһугар Олоҥхо декадата бииртэн биир чаҕылхай тэрээһиннэринэн саҕаланна …
