Алтынньы 27-31 күннэригэр Москваҕа Аан дойдутааҕы «РОЗА ВЕТРОВ» күрэх 29-с сезонун түмүктүүр кылаан көрүүтэ буолар.
Хампатааҕы оҕо театральнай искусствотын оскуолатын 23 кыттааччылаах, 3 салайааччылаах көрдөрүүлээх коллектива күрэххэ кытта дойдубут киин куоратыгар тиийдэ.
Коллектив бу күрэххэ оскуола директора, режиссер Саха Республикатын культуратын үтүөлээх үлэһитэ Н.И.Ксенофонтов суруйуутугар уонна туруоруутугар «Кыырай халлаан кыыһа Кыталы Куо» саҥа этно-драматическай испэктээҕи көрдөрүөҕэ. Алтынньы 30 күнүгэр түмүктүүр Гала- кэнсиэр кэмигэр Николай Ивановичка Арассыыйа театральнай диэйэтэллэрин Сойууһа 2023 сыл олунньу 23 күнүгэр анаабыт «ПРИЗНАНИЕ-2023» бириэмийэтин туттарыахтара.
Аан дойдутааҕы, Арассыыйатааҕы үрдүк түһүлгэлэргэ Сахабыт сирин, төрөөбүт Бүлүүбүтүн дорҕоонноохтук ааттатар оҕолорбутугар, эдэр кэскиллээх талааннарбытыгар үтүө айаны уонна ситиһиини алгыыбыт!
Саҥа испэктээҕи Бүлүү куоратын театры сэргиир көрөөччүлэрэ М.Н.Жирков аатынан Оройуоннааҕы култуура Дыбарыаһыгар сэтинньи 26 күнүгэр күүтэбит.
