Ыам ыйын 12 күнүгэр Саха АССР үтүөлээх агронома, тыа хаһаайыстыбатын наукаларын кандидата, Саха Өрөспүүбүлүкэтин наука уонна техника салааларыгар судаарыстыбаннай бириэмийэтин лауреата Мария Алексеевна Черткова төрөөбүтэ 95 сыла туолла.
Мария Алексеевна — олоҥхо дойдутун хоһуйбут биир дойдулаахпыт Саха норуодунай бэйиэтэ Иван Михайлович Гоголев – Кындыл тапталлаах кэргэнэ, олоҕун устата бииргэ буолбут бигэ тирэҕэ, тапталлаах оҕолорун күн күбэй ийэлэрэ, саамай чугас уонна күндү киһитэ…
Улуу поэт кини тапталынан уонна кыһамньытынан литература бары жанрдарыгар –поэзияҕа, прозаҕа, драматургияҕа үтүө санаа, мындыр буолуу, ийэ айылҕа кэрэтиттэн сөҕөр –махтайар, хоту дойдуга, төрөөбүт кыраайга таптал туһунан араас айымньылары суруйар кыахтаммытын туһунан билинэрэ.
Саха дьонугар Иван Михайлович саха литературатын номоҕунан буолбута, онтон Мария Алексеевна –хоту дойдуга саады үүннэрэн номоххо киирбитэ. Кинилэр иккиэн кимнээҕэр даҕаны ордук төрөөбүт сирдэрин, айылҕаларын, дьонун-сэргэтин таптыыллара уонна ону улахан духуобунай уонна материальнай нэһилиэстибэ оҥорон хаалларбыттара.
Норуодунай поэт Күнчээнэ буолбут Аҕа дойду Улуу сэриитин бэтэрээнэ, биллиилээх учуонай-селекционер, ирбэт тоҥҥо бастакы саады үүннэрбит Мария Алексеевна Черткова, бүлүүлэр, бүтүн Саха сирин дьоно бүтүннүү сүгүрүйэр Далбар Хотуна, биһиги өйбүтүгэр өрүү баар.
