Хайа баҕарар сиргэ нэһилиэнньэ олоҕун-дьаһаҕын киэргэтэр, күннээҕи түбүктэн кэрэ эйгэтигэр сыһыаран сынньатар айар түмсүүлэр, уус –уран самодеятельность кэллэктииптэрэ элбэхтэр. Олор истэригэр ордук олохтоохтук, айымньылаахтык үлэлиир норуодунай ааттаммыт кэллэктииптэр бааллар. Бу маннык үрдүк билинии элбэх үлэнэн ситиһиллэр уонна хас биэс сыл аайы отчуоттанан салгыы бигэргэнэр.
Өрөспүүбүлүкэҕэ уопсайа 200-тэн тахса маннык кэллэктиип баар эбит буоллаҕына, Бүлүү улууһугар 6-лар.
Бу дьыл бэс ыйын 10 күнүгэр болдьохторо туолбут икки кэллэктиип өрөспүүбүлүкэ хамыыһыйатыгар үрдүк ааты көмүскүүр айар үлэлэрин көрдөрдүлэр.
Бастакынан хамыыһыйа Н.И.Ылахова аатынан «Алгыс» НКК иһинэн үлэлиир СР культуратын үтүөлээх үлэһитэ Владимир Васильевич Васильев салайааччылаах народнай үлэтин көрдө-иһиттэ. Кэллэктиип үлэтин норуот уус-уран айымньытын тарҕатыыга, сайыннарыыга, толоруу маастарыстыбатын үрдэтиигэ туһаайар. Республикаҕа, Россияҕа ыытыллар көрүүлэргэ, фестивалларга Кылаан кыайыылааҕынан, хас да төгүл лауреатынан буолуталаабыта. Ыччаты патриотическай тыыҥҥа иитиигэ утумнаах үлэни ыытар.
Иккис коллектив- Н.Г.Чернышевскай аатынан Бүлүүтээҕи профессионально-педагогическай колледж “Айылгы” ырыа –үҥкүү норуодунай кэллэктиибэ. Салайааччы –СР үөрэҕириитин уонна култууратын туйгуна Валерий Вячеславович Томскай.
30 сыл ынараа өттүгэр тэриллибит ансаамбыл саҥа эдэр эрчимнээх коллектива кэнники сылларга элбэх республика күрэхтэрин, фестивалларын кыайыылааҕа. IX Аан дойдутааҕы фестиваль 1 степеннээх үрдэлин лауреата, Бүтүн Россиятааҕы үҥкүү фестивалларын икки төгүллээх Кылаан бирииһин хаһаайына.
Саха Өрөспүүбүлүкэтин норуодунай, Российскай Федерация үтүөлээх артыыһа А.Д.Афанасьев бэрэссэдээтэллээх хамыыһыйа, кэллэктииптэр үлэлэрин көрөн, сыаналаан, “Норуодунай кэллэктиип” ааттарын бигэргэттэ.
Хамыыһыйа чилиэннэрэ Өрөспүүбүлүкэтээҕи норуот айымньытын дьиэтин норуот айымньытыгар специалистара А.Т. Аммосова, А.В. Васильева, Н.Н.Терютин, «Симэх» норуот уус-уран айымньытын уонна оҥоһуктарын национальнай киинин специалиһа Д.В.Гуляева салайааччыларга дириҥ ырытыы оҥордулар, көстүбүт итэҕэстэри-быһаҕастары ыйан туран, инники үлэлииллэригэр элбэх туһалаах сүбэлэри биэрдилэр .
Култуура сайдыытын уонна норуот айымньытын орйуоннааҕы киинин аатыттан Васильев норуодунай хорун уонна “Айылгы” ырыа –үҥкүү норуодунай кэллэктиибин ааттара бигэргэммитинэн истиҥник эҕэрдэлиибит! Саҥа үрдэллэри, сонун айымньылары күүтэбит.
