Маннык ааттаах ураты кэнсиэр бэс ыйын 12 күнүгэр М.Н.Жирков аатынан оройуоннааҕы культура дыбарыаһыгар буолан ааста.
Саха АССР төрүттэммитэ 100 сылыгар анаммыт академическай кэнсиэр, Россия күнүгэр туруоруллубута, Бүлүү дьонугар-сэргэтигэр чахчы умнуллубат бэлэҕинэн буолла.
Бу кэрэ киэһэни В.А. Босиков аатынан музыка үрдүкү оскуолатын выпускниктара: М.Н.Жирков аатынан музыкальный колледж скрипка кылааһын преподавателэ Андрей Дедюкин, В.А. Босиков аатынан музыка үрдүкү оскуолатын фортепиано кылааһын преподавателэ Алексей Слепцов уонна Д.К.Сивцев -Суорун-Омоллоон аатынан опера уонна балет театрын солистката, биир дойдулаахпыт Мария Михайлова Дьокуускай куораттан анаан кэлэн бэлэхтээтилэр.
Толору көрөөччүлээх саала ураты эйгэҕэ куустаран, иһийэн олорон, Сахабыт биллиилээх композитордара Марк Жирков, Захар Винокуров, аан дойдуга аатырбыт нуучча уонна омук композитордара Петр Чайковскай Сергей Рахманинов, Иоганн Себастьян Бах, Николо Паганини, Эдвард Григ о.д.а. өлбөт-сүппэт айымньыларын иһиттилэр. Концеры Саха республикатын култууратын туйгуна Николай Афанасьев -Айдаман иилээн-са5алаан биир чаас күлүм түгэн курдук биллибэккэ ааста.
Түмүккэ, көрөөччүлэр музыка алыптаах эйгэтигэр үлэлии-хамсыы сылдьар ыалдьыттарга махтанан сүһүөхтэригэр туран ытыстарын таһыннылар, кэрэ сибэккилэри туттардылар. Хардатын ыалдьыттар Бүлүү дьоно музыкаҕа, искусствоҕа ураты истиҥ сыһыаннаахтарын, үрдүк интэриэстээхтэрин бэлиэтээн туран, өссө да инники бииргэ үлэлэһэргэ баҕа санааларын биллэрдилэр.
Маннык ураты тыыннаах классическай концерт Саха сирин бастакы президенэ М.Е.Николаев фондатын, Бүлүү улууһун дьаһалтатын (С.Н.Винокуров), культура сайдыытын уонна норуот айымньытын оройуоннааҕы киинин (А.А.Дашевская), үөрэҕирии улуустааҕы салалтатын (Н.М.Семенова) өйөбүллэринэн тэрилиннэ.
Сахалар киэн туттуубут Марк Николаевич Жирков «Хаһан эрэ мин Бүлүүм музыка, олоҥхо биһигэ буолуо»‘ – диэбитэ күнтэн күн туолан иһэр курдук…Ол мэктиэтинэн кэнсиэри музыканы сэргиир, үөрэтэр элбэх кыра, орто саастаах оҕолор кэлэн сэҥээрэн көрбүттэрэ, истибиттэрэ буолар. Кинилэр өйдөрүгэр хайаан да, туох эрэ саҥаны, сонуну, кэрэни иҥэринэн тарҕаспыт буолуохтаахтар….
