Кулун тутар 15 күнүгэр Саха өрөспүүбүлүкэтин норуодунай поэта, СӨ култууратын үтүөлээх үлэһитэ, П.А. Ойуунускай аатынан судаарыстыбаннай бириэмийэ лауреата, прозаик, тылбаасчыт Михаил Елисеевич Тимофеев 90 сылыгар аналлаах үөрүүлээх тэрээһин, поэт төрөөбүт күнүгэр Марк Николаевич Жирков аатынан оройуоннааҕы култуура Дыбарыаһыгар буолла.
Маннык айылҕаттан талааннаах киһи эрэ кэрэхсиир киһитэ кимтэн кииннээҕин, хантан хааннааҕын, туохтан тууралааҕын, олоҕо-дьаһаҕа, үлэтэ-хамнаһа хайдах салаллыбытын туһунан Иван Михайлович Гоголев аатын сүгэр Бүлүүтээҕи кииннэммит библиотечнай систиэмэ үлэһитэ Саха өрөспүүбүлүкэтин туйгуна Никита Петрович Михайлов билиһиннэрдэ.
Бу үөрүүлээх күнүнэн «Бүлүү улууһа (оройуона) » муниципальнай оройуон баһылыгын социальнай боппуруостарга солбуйааччыта Александр Анатольевич Прокопьев, «Кыргыдай нэһилиэгэ» Муниципальнай тэриллии баһылыга Василий Егорович Александров, «Бороҕон нэһилиэгэ» муниципальнай тэриллии баһылыгын солбуйааччыта Тамара Иннокентьевна Колтовская ону сэргэ Оройуоннааҕы култуура сайдыытын уонна норуот айымньытын сайдыытын киинин салайааччытын эбээһинэһин толорооччута Никита Вячеславович Додутов эҕэрдэлээтилэр.
Михаил Елисеевич Тимофеев хоһоонноругар айыллан тахсыбыт ырыаларынан көрөөччүлэр биһирэбиллэрин ылбыт ымыылаах ырыаһыттар Кыргыдайтан Анна Иванова, Өкүндүттэн Агафья Петрова, Бороҕонтон Семен Федоров, Бөтүҥтэн Күн Күннэй, Бүлүү куоратыттан Августина Семенова, Камилла Семенова ылбаҕай ырыаларынан тэрээһини киэргэттилэр. СӨ култууратын үтүөлээх үлэһитэ Светлана Зинурова салайааччылаах «Ай-Лаана» уонна Юлия Федорова салайар «Кэрэли» үҥкүү бөлөхтөрө кэрэ үҥкүүлэринэн ситэрэн-хоторон биэрдилэр.
Бу киэһэ Михаил Тимофеев хоһооннорун Александр Иванов, Анна Протопопова, Анна Игнатьева ону сэргэ Г.С. Донской аатынан Бүлүүтээҕи 2 №-дээх орто оскуолаттан «Долун» уонна Г.И. Чиряев аатынынан Бүлүүтээҕи 1№-дээх орто оскуолаттан «Сайдам» бөлөхтөр ааҕан дьон сэҥээриитин ыллылар.
Тэрээһин норуодунай поэт, биир дойдулаахпыт Михаил Тимофеев тылыгар суруллубут Саха Өрөспүүбүлүкэтин Өрөгөйүн ырыатынан түмүктэннэ. Михаил Елисеевич суруйан хаалларбыт хоһоонноро өссө да ыллана турдуннар, айымньылара ааҕылла, ахтылла сырыттыннар. Эппиккэ дылы «Суруллубут- суоруллубат»!
