Төрөөбүт Бүлүүбүтүн үйэлэр тухары аар-саарга аатырдыбыт дьоммут- сэргэбит туһунан мэлдьи үтүө өйдөбүллээхпит. Кинилэр олорон ааспыт олохторо, дьоһуннаах үлэлэрэ-хамнастара дойду историятыгар хаалар, кэнчээри ыччатыгар холобур буолар аналлаахтар.
Бүгүн республикабыт кырдьаҕас үөрэҕин кыһата Н. Г. Чернышевскай аатынан Бүлүүтээҕи училище — профессиональнай-педагогическай колледж 100 сылын чэрчитинэн уонна эһиилги куораппыт 390 сааһын көрсө Бүлүү училищетыгар өр сылларга Саха сирин араас оройуоннарын ыччаттарын кэрэҕэ уһуйбут, ииппит Учуутал, Музыкант Абрам Владимирович Тараховскай олорбут Бүлүү куоратын
Ярославскай уул.75 дьиэтигэр Мэҥэ Бэлиэ туруорулунна.
Бүлүү куоратын музыка биһигэ диэн ааттыыллар. Манна улуу музыкант Марк Николаевич Жирков төрөөбүтэ, куорат олоҕор музыканы тарҕатыыга аан бастакы олугу уурбута. 1933 сыллаахха Москваҕа үөрэххэ барыар дылы 20-тэн тахса сыл куоракка музыкальнай оркестры үлэлэппитэ.
Кини үлэтин салҕаабыт, музыка кэрэ эйгэтин тарҕаппыт киһинэн Абрам Владимирович Тараховскай буолар. Кини 1905 сыллаахха Витимҥэ төрөөбүтэ. Бүлүүгэ 1945 сыллаахха училищеҕа учууталынан ананан кэлбитэ. Удьуоругар композитордар , скрипачтар бааллар эбит. Анал үөрэҕэ да суоҕун иһин айылҕаттан уһулуччу талааннаах музыкант буолан 80-ус сыллар ортолоругар дылы Бүлүүтээҕи педагогическай училищеҕа ырыа уонна музыка учууталынан үлэлээбитэ. Кини училищеҕа үлэлээбит 30 сылын устатыгар учуутал идэтигэр үөрэммит эдэр дьон духуобунай, музыкальнай-эстетическай сайдыыларыгар анаабыт үлэтэ элбэх устудьуоннар өйдөбүллэригэр өр сылларга хаалбыта. Бу дьиэҕэ талааннаах учуутал, музыкант кэргэнин Хампаттан төрүттээх Акулина Сидоровналыын уйа туттан, оҕолорун иитэн, айар үлэтигэр кынаттанан олорбутаКуораппыт историятыгар биир үтүө өйдөбүл буолар кэрэһити — Мэҥэ Бэлиэни туруорууну көҕүлээбит Абрам Владимирович саамай чугас дьоно Абрам Владимирович уола биллэр-көстөр музыкант, мелодист, музыкаҕа ыччаты уһуйааччы, Саха Республикатын культуратын туйгуна Игорь Абрамович олоҕун аргыһа Светлана Николаевна Мегежекская уонна кинилэр уоллара Былатыан Ойуунускай аатынан Саха академическай театрын сүрүн режиссера, Саха Республикатын искусстволарын үтүөлээх деятелэ Руслан Игоревич Тараховскай, сиэнэ ырыаһыт, мелодист Геннадий Борисович Тараховскай дьиэ кэргэнэ буолаллар. Мэҥэ бэлиэни арыйарга кыттыыны ыллылар Бүлүү улууһун баһылыга С.Н. Винокуров, Бүлүү куоратын баһылыгын солбуйааччы Н.В.Иванов, Бүлүүтээҕи профессиональнай- педагогическай колледж директора И.И.Алексеев, Абрам Владимирович үөрэнээччилэрэ, 80 саастарын ааспыт ытык-мааны дьоннорбут, педагргическай үлэ бэтэрээннэрэ И.П. Прокопьева, П.Д.Иванова, Е.Г.Николаева, музыкант уолаттарын үөлээннээхтэрэ Л.К.Бугуев, В.М. Попов, В.Н.Платонов уо.да.а.
Бу дьиэ, уһаайба билиҥҥи хаһаайыттарыгар Мария Петровна уонна Гордей Иннокентьевич Томскайдарга Бэлиэ туруутугар көмөлөрүнэн иһин махтанабыт.
Бүлүүбүт биир киэн туттар учуутала, музыка эйгэтигэр аатын-суолун хаалларбыт ытык-мааны киһибит Абрам Владимирович Тараховскай туһунан үтүө өйдөбүл өрүү баар буоллун!
