Аҕа дойдуну көмүскүүр Улуу сэрии сыллара хонон турдахпыт аайы ырааттар ыраатан иһэллэр. Ол да буолар норуот холобура суох хорсун быһыыта, эйэ, көҥүл иһин охсуһууга килбиэннээх Кыайыыта, олорон ааспыт ураты олоҕо история хаһан да өлбөөдүйбэт чаҕылхай буоланнар биһиги өйбүтүгэр-сүрэхпитигэр мэлдьи тыыннаахтар.
Ыам ыйын 5 күнүгэр В.О. Каратаев аатынан Олоҥхо дьиэтигэр Улуу Кыайыы 78 сылыгар аналлаах Бүлүү улууһун тыыл, үлэ ветераннарын уонна сэрии кэмин оҕолорун итии чэйдээх, алгыстаах аһылыктаах сандалы тула бырааһынньыктааҕы көрсүһүүлэрэ буолла.
Үгэс курдук сыллата ыытыллар маннык көрсүһүүгэ ытык-мааны дьоннорбут улууспут нэһилиэктэриттэн киирэн үөлээннээхтэрин кытта көрсүһэн, үөрэн-көтөн сэргэхсийэн бараллар.
Күндү дьоммутун Бүлүү улууһун баһылыга Сергей Николаевич Винокуров, Бүлүү улууһун оройуоннааҕы депутаттарын Сэбиэтин бэрэссэдээтэлэ Гаврил Семенович Корякин, Бүлүү куоратын баһылыгын солбуйааччы Николай Варламович Иванов, Бүлүү улууһун бэтэрээннэрин сэбиэтин бэрэссэдээтэлэ Герасим Алексеевич Солтуев, СР үлэҕэ уонна социальнай сайдыыга Министерствотын Бүлүүтээҕи социальнай харалтаҕа управлениетын салайааччыта А.А. Каратаева, Чернышевскай нэһилиэгин баһылыга А.С. Амбросьев, Украинаҕа байыаннай дьайыы кыттыылааҕа Эркин Быйаман Тургун уола эҕэрдэлээтилэр.
Аҕа дойдуну көмүскүүр Улуу сэриигэ хорсуннук охтубут, сэрииттэн эргиллэн кэлэн эйэлээх олоҕу тутуспут уонна бу күҥҥэ тиийбэтэх буойуттарбыт, тыыл үлэһиттэрин сырдык ааттарын кэриэстээн, ахтан аастылар.
Кыайыыны аҕалсыбыт ытык дьоммутугар эҕэрдэлээн, махтанан Бүлүүтээҕи алын сүһүөх оскуола оҕолоро (сал. Инга Варфоломеева), С.М. Аржаков аатынан дьиэ кэргэҥҥэ иитиини өйүүр Бүлүүтээҕи Киин иитиллээччилэрэ ( сал. А. Н. Игнатьева), Бүлүүтээҕи каһаактар хордара (сал. Елена уонна Иван Туласыновтар), Советскай Союз Геройа Н.С. Степанов аатынан оскуола үөрэнээччитэ Саина Васильева, ырыаһыттар Раиса Яковлева, Ольга Корякина, Олег Петров, Анна Игнатьева, Екатерина Алексеева, Өкүндүттэн Иван Данилов, Чочуттан Мэҥкэр Сэмэн Хабырыыл уола ылбаҕай ырыа-тойук бэлэхтээн үөртүлэр.
Көрсүһүүнү ыытааччы Луиза Кононова кэлбит бэтэрээннэри кытта ис сүрэхтэн иһирэхтик сэһэргэстэ.
Сэрии толоонугар уонна тыылга Кыайыыны аҕалбыт биир дойдулаахтарбыт хорсун быһыылара уонна дьоһуннаах үтүөлэрэ үгүс көлүөнэлэр өйдөрүгэр-санааларыгар дириҥник иҥэн, эр санааланыы уонна Ийэ дойдуга итии таптал, төрөөбүт-үөскээбит сирбитин көмүскээһин чаҕылхай холобурунан буола туруоҕа!
Көрсүһүү кыттыылаахтара билигин буола турар анал байыаннай дьайыыттан долгуйалларын биллэрдилэр, улууспут уолаттарыгар өйөбүл оҥорууну күүһүрдэргэ эттилэр, этэҥҥэ эргиллэн кэллиннэр диэн эрэллээх буоларга ыҥырдылар.
Күндү дьоммут! Эһиэхэ бары үтүөнү, этэҥҥэ буолууну баҕарабыт!
