диэн өрөгөйдөөх Кыайыы 77 сылыгар анаммыт Аҕа дойду Улуу сэриитин, тыыл, үлэ ветераннарын, сэрии сылын о5олорун Бүлүү куоратыгар чиэстээһин, ыам ыйын 6 күнүгэр В.О.Каратаев аатынан Олоҥхо дьиэтигэр ыытылынна.
Бу, дойдубут хас биирдии киһитигэр саамай сырдык бырааһынньыгы, ытык-мааны дьоммут, тыыл, үлэ ветераннара, сэрии кэмин оҕолоро саха дьонун сиэринэн итии чэйдээх остуол тула олорон көрүстүлэр. Үөрүүлээх тэрээһин «Ыллык» түмсүү өбүгэ үгэһин ырыатын-тойугун эҕэрдэтинэн саҕаланна. (Салайааччы В.С. Николаев).
Күн бүгүн Бүлүү улууһугар уоттаах сэрии кыттыылаахтара Я.П.Григорьев, Н.И.Афанасьев, сэрии бэтэрээнин 10 огдообото, 113 тыыл бэтэрээнэ уонна 438 сэрии сылын оҕолоро олороллор.
Мустубут дьон төрөөбүт Бүлүүбүтүттэн Аҕа дойдуну көмүскүүр Улуу сэрии толоонугар олохторун толук уурбут хорсун буойуттарга, сэрииттэн эргиллэн бүгүҥҥү дьоллоох олохпутун тутуспут уонна бу күҥҥэ тиийбэтэх сэрии кыттыылаахтарыгар, сэрии огдооболоругар, тулаайахтарыгар, оонньооботох оҕо саастаах бүгүҥҥү аҕа көлүөнэҕэ- тыыл ветераннарыгар дириҥ махталларын биллэрдилэр .
Мантан салгыы ытык-мааны дьоммутун Сахабыт автономията төрүттэммитэ 100 сылынан уонна Улуу Кыайыы 77 сылынан Бүлүү улууһун баһылыга С.Н.Винокуров, оройуон сэбиэтин председателэ Г.С.Корякин, Бүлүү улууһун бэтэрээннэрин сэбиэтин председателэ Г.А.Солтуев, Бүлүү куоратын бэтэрээннэрин сэбиэтин председателэ Ф.Ф.Николаев, Саха Республикатын үлэҕэ уонна социальнай сайдыыга министерствотын Бүлүү улууһунааҕы салаатын салайааччыта А.А.Каратаева эҕэрдэлээтилэр.
Кыайыыны уһансыбыттарга бу өрөгөйдөөх күн үгүс үтүө махтал, алгыс тыла ананна. Оччотооҕу кэми санатар Васильев народнай хорун толоруутугар дириҥ ис хоһоонноох ырыалар сүрэҕи долгуттулар.
Илбэҥэ, Лөкөчөөн, Тааһаҕар, Чочу, Кыадаҥда, Бөтүҥ, Чернышевскай, Өкүндү нэһилиэктэрин, Бүлүү куорат о.д.а тэриллиилэр баһылыктара, бэтэрээннэрин Сүбэлэрэ кырдьаҕастарын илдьэ өрөгөйдөөх үөрүүнү үллэстэ тэринэн киирбиттэрэ бырааһынньыгы олус киэргэттэ.
Ааспыт сэрии алдьархайын эттэринэн — хааннарынан билбит ытык кырдьа5астарбыт, эһиги баар буолаҥҥыт бүгүҥҥү халлааммыт ыраас, нуурал! Кыайыыны уһансыбыттарга барҕа махтал! Сарсыҥҥы саргыбыт салалыннын, кэлэр кэскилбит кэтирээтин, үйэлээх үгэспит салҕана турдун, үүнүүбүт-сайдыыбыт үрдээн истин !
Ытык –мааны дьоммут сүргэлэрэ көтөҕүллэн, харахтара чоҕулуйан, бырааһынньыктаааҕы тэрээһиҥҥэ бука бары көхтөөхтүк кыттыбыттара барыбытын үөртэ. Күндү дьоммут, этэҥҥэ эрэ сылдьыҥ, өлүөр-сөлүөр буолуҥ!
Үс хотой Геройдаах Бүлүү дьоно умнубат хааннаах өстөөх өһүн, сэриигэ өлбүт хаан-уруу дьонун. Кинилэр бааллар биһиги бүгүҥҥү уонна сарсыҥҥы күүрээннээх олохпутугар!
