Бүлүү улууһун иистэнэр-уһанар, айар-тутар дьоҕурдаах дьонун түмэр Уус Кыһатыгар Бүлүү иис-уус дьоҕурдаахтарын үлэлэрин дьон-сэргэ билиитигэр-көрүүтүгэр таһаарар сыаллаах “Вилюйск мастеровой” («Уус-Иис Бүлүү”) диэн быыстапка былаан быһыытынан сылы быһа быстыбакка үлэлиир.
Бүгүн Россияҕа учуутал уонна уһуйааччы, Саха сиригэр Үлэ, Бүлүү улууһугар Доруобуйа сылларын чэрчитинэн Бүлүү улууһун норуотун маастара, Россия декоративнай-прикладной искусствотын худуоһунньуктарын Союһун чилиэнэ, Григорий Федотович Николаев аатынан Бөкчөҥөө орто оскуолатын хаһаайыстыбаннай үлэҕэ салайааччыта Ирина Зиновьевна Афанасьева «ИИС АБЫЛАҤА” тус быыстапката аһылынна.
Ирина Зиновьевна Өлүөхүмэттэн төрүттээх, Бөтүҥ дэриэбинэтигэр кийиит буолан кэлэн билигин дэриэбинэ биир дьоһун ыалын алаһа дьиэтин мааны Айыыһыта, күндү кийиит, тапталлаах кэргэн, күн күбэй Ийэ буолан ньир-бааччы олорор. Нэһилиэккэ, улууска ыытыллар тэрээһиннэргэ көхтөөхтүк кыттар.
Сахалыы ииһинэн илиитин араарбакка 2012 сыллаахтан дьарыктанар. 2013 сылтан улуус, республика быыстапкаларыгар кыттар. Сиэлтэн-кылтан араас сиэдэрэй үлэлэри, сахалыы кыбытыгынан араас оҥоһуктары оҥорон дьону-сэргэни кэрэхсэтэр, туттар маллары, кэтэр таҥастары оҥорон дьон махталын ылар. Оҥоһуктара быыстапкаларга үрдүк сыанабылы ылаллар. 2020 сылтан Россия таһымнаах «РусАртСтиль», «Золотые руки России», «Уникальная Россия», «Сокровища Севера», Невский Ларец», Казань-Арт Галерея быыстапкаларга ситиһиилээхтик кыттар. Аҕыйах хонуктааҕыта «Уникальная Россия – 2023» быыстапка-форумҥа «Ат толору” симэҕэ үлэтэ Дипломунан бэлиэтэннэ.
Ирина оҕо сааһыттан саҕалаан тугу кэрэхсии көрбүтүн, сөҕө-махтайа ылыммытын дууһатыгар дириҥник иҥэриммитин өр кэмҥэ илдьэ сылдьан баран сүрэҕин баҕатын тарбаҕын талаанынан тиһэн иистэммитин, оҥорбутун-туппутун бүгүн Бүлүү дьонун көрүүтүгэр, билиитигэр таһаарар быыстапкатын аһыллыытынан Бүлүү улууһун дьаһалтатын социальнай уонна ыччат политикатыгар отделын начальнига Аксинья Андреевна Кудайдердиева, культура сайдыытын уонна норуот айымньытын оройуоннааҕы Киинин салайааччыта Алена Александровна Дашевская, Бүлүү улууһун уопсастыбаннай түмсүүлэрин салайааччыта, Өрөспүүбүлүкэтээҕи “Утум” уопсастыбаннай тэрилтэ Бүлүүтээҕи салаатын дириэктэрэ Мария Петровна Томская, Г.Ф Николаев аатынан Бөкчөҥөө орто оскуолатын дириэктэрэ Светлана Иннокентьевна Бубякина, Бөкчөҥөө нэһилиэгин дьаһалтатын уонна “Арчы” норуот айымньытын Дьиэтин коллективын аатыттан Владимир Рудольфович Петров, “Дьүөгэлэр” түмсүү салайааччыта Саха Өрөспүүбүлүкэтин норуотун маастара Сусанна Прокопьевна Семенова эҕэрдэлээтилэр. Музыкальнай эҕэрдэни Александр Иванов бэлэхтээтэ.
Быыстапка аһыллыытын кыттыылаахтара Ирина Зиновьевна үрдүк түһүлгэҕэ аан бастаан таһаарбыт үлэтин 19 –с үйэтээҕи дьахтар мааны таҥаһын — сукунаттан, буобура, бэдэр, кыһыл саһыл тириилэриттэн тигиллибит, тимиринэн, оҕуруонан киэргэтиллибит бууктаах сону, дьабака бэргэһэни, үтүлүгү сөҕө-махтайа көрдүлэр. Бу үлэ саҥардыыта историческай наука кандидата Светлана Ивановна Петрова – Уран Хатыҥ хомуйан таһаарбыт 100-кэ маастар туһунан кылгас иһитиннэриилээх саха Ииһин каталогун иккис чааһыгар киирдэ. Ирина Зиновьевна үлэтэ сыаналанан каталогка киирбитинэн истиҥ эҕэрдэлиибит.
«ИИС АБЫЛАҤА” быыстапка Уус Кыһатыгар кулун тутар 13 – 17 күннэригэр туруоҕа.
Куорат олохтоохторун, ыалдьыттарын норуот талааннааҕын быыстапкатын кэрэхсээн, сэргээн кэлэн көрөргүтүгэр ыҥырабыт!
