Ыам ыйын 8 күнүгэр М.Н.Жирков аатынан культура дыбарыаһа Улуу Кыайыы 77 сылыгар анаммыт үөрүүлээх мунньахха Бүлүү куоратын, улууһун олохтоохторун ол кэми санатар күүрээннээх ырыаларынан, дьэрэкээн былаахтарынан тэлибирии уруйдуу-айхаллыы көрүстэ.
Үөрүүлээх мунньах Российскай Федерация уонна Саха Өрөспүүбүлүкэтин Өрөгөй ырыаларын культура сайдыытын уонна норуот айымньытын оройуоннааҕы киинин холбоһуктаах хора уонна Бүлүүтээҕи 1 №-дээх начальнай оскуола 3 кылааһын үөрэнээччилэрин толорууларынан саҕаланна.
Саалаҕа мустубут дьон Кыайыы бэлиэтин- кытыаста кыыһар Кыһыл Знамя куоппуйатын сүһүөҕэр туран көрүстэ. Бу- Аҕа дойду Улуу сэриитигэр сэбиэскэй норуот хорсун быһыытын, килбиэннээх кыайыытын Ытык бэлиэтин улуус бастыҥ үөрэнээччилэрэ , “Юные патриоты” кулууп чилиэннэрэ Андрей Наумов, Николай Николаев, Марк Иванов күөрэччи көтөҕөн киллэрдилэр.
Бу курдук саҕаламмыт Бүлүү улууһун общественноһын Кыайыы 77 сылыгар анаммыт үөрүүлээх мунньаҕын оройуон депутаттарын Сэбиэтин бэрэссэдээтэлэ Г.С. Корякин салайан ыытта.
Хаан тохтуулаах сэриигэ охтубут, эйэлээх кэми уһансыбыт уонна бүгүҥҥү күҥҥэ тиийбэтэх үтүө-мааны дьоммутун биир мүнүүтэлээх ытык тохтобулунан кэриэстээн сүгүрүйүү кэнниттэн сүрүн дакылааты улуус баһылыга С.Н.Винокуров оҥордо.
Долгутуулаах түгэнинэн Аҕа дойдуну көмүскүүр Улуу сэрии кыттыылаахтара Дьокуускай куораттан Саха Республикатын норуотун хаһаайыстыбатын үтүөлээх үлэһитэ, Саха Республикатын бочуоттаах олохтооҕо К. Е. Павлов, Бүлүү куоратыттан Саха Республикатын норуодунай учуутала, Саха сирин Ытык аҕата Н. И. Афанасьев биир дойдулаахтарыгар ыыппыт эҕэрдэлэрин тириэрпиттэрэ буолла.
Кыайыыны уһансыбыт ытык кырдьаҕастарга элбэх эҕэрдэ, махтал тыллара этилиннилэр. Сэрии алдьархайын кэлэр ыччакка тиэрдэр, кинилэри дойдуга бэриниилээх буоларга иитэр соруктары бэлиэтэннилэр.
Бу киэһэҕэ соторутааҕыта Москва куоракка Саха АССР тэриллибитэ 100 сылыгар аналлаах үөрүүлээх тэрээһини ситиһиилээхтик арыйбыт культура сайдыытын уонна норуот айымньытын оройуоннааҕы киинин холбоһуктаах хора (Салайааччы СӨ культуратын туйгуна Ольга Корякина) бүлүүлэр киэн туттуубут Марк Жирков саха саргытын туойбут өлбөт-сүппэт айымньыларын толорон, чахчы да Улуу Кыайыы үөрүүтүн иҥэрдэ.
Сиргэ сайдыы, дьол-соргу, ил-эйэ кэрэһитэ буолан Улуу Кыайыы күнэ үйэлэр тухары өспөккө күлүмүрдүү, сыдьаайа турдун!
