Тохсунньу 27 күнүгэр Россиятааҕы «Новая звезда» күрэххэ ситиһиилээхтик кыттан, продюсер Игорь Матвиенко анал бирииһин хаһаайына, республикатааҕы “Үрдэл” күрэх кыайыылааҕа, Сыдыбыл нэһилиэгиттэн төрүттээх эдэр ырыаһыт Субудай Айыы Арчылаан Дьулустаан Уола – Кит Джа биир дойдулаахтарыгар концертаан ааста.
Концерт үрдүк тэрээһиннээхтик буолла
Саалаҕа ырыаһыт сэҥээрээччилэрэ толору муһуннулар. Хас биирдии ырыаны көрөөччүлэр ырыаһыты кытта тэҥҥэ ыллаһа олорбуттара, кини үлэтин сыаналыылларын, үчүгэйдик билэллэрин көрдөрдө. Ыытааччы араас оонньуулары оонньотон дьон сүргэтин көтөхтө. Кит Джа бииргэ төрөөбүт убайын кытта аҕаларын Дьулустаан Иванов ырыатын толорбуттарын мустубут дьон сэргии иһиттилэр.
Культура управлениетын начальнига Алена Александровна Дашевская ырыаһыкка эҕэрдэ суругу уонна өйдөбүнньүк бэлэҕи туттарда, бүлүүлэр уолбутунан киэн туттарбытын, кинини кытта тэҥҥэ үөрэрбитин иһитиннэрдэ уонна инникитин да үрдүк ситиһиилэри баҕарда.
Улуустааҕы культура управлениета
