От ыйын 14-16 күннэригэр Бүлүүбүт кэрэ миэстэтэ «Хомустаах» культурнай-этнографическай киинэ өрөспүүбүлүкэбит көхтөөх ыччатын түһүлгэтинэн буолуо.
Үтүө үгэскэ кубулуйбут “ТАБЫС” (Таптаа, Алҕаа, Байыт, Ытык Сиргин) фестивальга 17 улуустан уонна 4 уопсастыбаннай түмсүүттэн 700-чэ киһи үс күн устата өркөн өй, талба талаан, өбүгэ төрүт иис-уус оҥоһуктарын, илии-атах оонньууларын күрэстэригэр илин-кэлин түсүһүөхтэрэ.
Бу күннэргэ культура сайдыытын уонна норуот айымньытын оройуоннааҕы киинэ фестивальга бэлэмнэнии үлэтин түмүктүүр эппиэттээх түһүмэхтэрин быыһа суох ыытар.
Ытык Бүлүү сиригэр тэриллэр норуот инники кэскилин -кэнчээри ыччаты тоҕуорутар, сомоҕолуур дириҥ суолталаах тэрээһин хас биирдии кыттааччыга хатыламмат көрсүһүүлэри, чаҕылхай түгэннэри, өрөгөйдөөх чаастары бэлэхтээтин! Ыалдьытымсах дьоно-сэргэтэ бастыҥ сэргээччи, сэҥээрээччи буолан, эдэрдэргэ саҥа саҕахтары арыйан, сайдар суолга сирдээтин!
