Дьылҕа кытаанах… Биир идэлээхпит култуура сайдыытын уонна норуот айымньытын оройуоннааҕы Киинин методиһа, аҕа табаарыспыт, дьүөгэбит, Бүлүү мааны Далбар кийиитэ, Саха Өрөспүүбүлүкэтин үөрэҕириитин туйгуна Тамара Прокопьевна СТЕПАНОВА ыарахан ыарыыттан күн сириттэн эрдэ күрэннэ. Кини Бүлүү педучилищетыгар үөрэнэ кэлбит сылларыттан оройуон култууратын уонна духуобунаһын сайдыытыгар бэйэтин айар талаанын, тэрийэр дьоҕурун анаабыта. Аатырбыт олоҥхоһуппут В. О. Каратаев тэрийбит олоҥхоһуттар уонна тойуксуттар «Аар Дьаҕыл» ансамбылларын бастакы кыттааччыларыттан биирдэстэрэ. Өр сыллар усталарыгар элбэх өрөгөйдөөх үөрүүлээх тэрээһиннэр, бэстибээллэр солбуллубат чуолкай чуор куоластаах ыытааччылара этэ. Улуус дьаһалтатын баһылыгын социальнай политикаҕа солбуйааччытынан, Бүлүү куоратыгар ыытыллыбыт Өрөспүүбүлүкэтээҕи Олоҥхо Ыһыаҕын дирекциятын салайааччытынан үлэлээбит сылларыгар улуус бары нэһилиэктэрин, тэрилтэлэрин кытта быстыспат ситимнээхтик үлэлээбитэ, улуус олохтоохторун, култууратын үлэһиттэрин убаастабылларын ылбыта. Кэнники кэккэ сылларга биһиги тэрилтэбитигэр таһаарыылаахтык үлэлээтэ. Өрөспүүбүлүкэтээҕи Олоҥхо Ассоциациятын Бүлүүтээҕи салаатын салайааччытын быһыытынан олоҥхоһуттары үйэтитиини, Бүлүү олоҥхотун тарҕатыыны, сайыннарыыны, аҕа саастаах уонна эдэр талааннары өйөөһүнү дьоһуннаахтык салайбыта. Маны сэргэ норуот үйэлэр тухары тутан кэлбит төрүт дьарыгын сөргүтүүгэ, уус-уран оҥоһуктар маастардарын, уустары Арассыыйа, Аан дойду таһымыгар таһаарыыга хоннохтоохтук ылсан үлэлээн суолун-ииһин хаалларда.
Иллээх дьиэ кэргэн алгыстаах Айыыһыт Хотуна, үтүө санаалаах дьүөгэ, сатабыллаах салайааччы этэ. Кэрэни кэрэхсиирэ, үчүгэйтэн, ситиһиилэртэн истиҥник үөрэрэ. Ылсыбыта ыллыктаах, үтүө түмүктээх буолара. Кимиэхэ баҕарар көмөлөһө, сүбэлии сылдьара, дьоҥҥо ытыктабыллаахтык сыһыаннаһара, дьону сыаналыыра. Уонна олоҕу таптыыра…
Чугастык алтыспыт ытыктыыр Тамара Прокопьевнабыт туһунан сырдык өйдөбүл, сылаас ахтыы биһиги сүрэхпитигэр өрүү хаалыа…
Култуура сайдыытын уонна норуот айымньытын оройуоннааҕы Киинин кэллэктиибэ.
