М.Н. Жирков аатынан оройуоннааҕы культура Дыбарыаһын историческай саалатыгар Саха Республикатын Судаарыстыбаннай Мунньаҕын (Ил Түмэн) бэрэссэдээтэлэ Алексей Ильич Еремеев салайааччылаах делегация ыалдьыттаата. Улуус баһылыга С.Н. Винокуров, депутаттар оройуоннааҕы Сэбиэттэрин бэрэссэдээтэлэ Г.С. Корякин арыаллаатылар.
Ыалдьыттар саалаҕа Бүлүү улууһуттан Саха сирин биллиилээх судаарыстыбаннай деятеллэрэ С.М. Аржаков, С.Ф. Гоголев, Г.И. Чиряев туһунан сырдатар интерактивнай матырыйааллары, Бүлүү чулуу дьонугар аналлаах стендэлэри, витриналары сэргээтилэр. Экскурсияны Советскай Союз Геройа Н.С. Степанов аатынан оскуола историяҕа уонна обществознаниеҕа учуутала, улуустааҕы ыччат Сэбиэтин чилиэнэ Сардаана Егорова ыытта.
