Бүгүн, о.э. кулун тутар 4 күнүгэр И.М.Гоголев-Кындыл аатынан кииннэммит библиотекаҕа тыл үөрэҕин билимин доктора, профессор, Аан дойдутааҕы хомус киинин, түмэлин төрүттээччи биир дойдулаахпыт И.Е.Алексеев-Хомус Уйбаан «Куйаартан кутуллар дорҕооннор» диэн кинигэтин ааҕааччыларга билиһиннэрии буолла.
Дойдубутугар норуоттар нэһилиэстибэлэрин сылыгар үйэлээх бэлэх буолбут кинигэ тула кэпсэтиигэ Иван Егорович тус бэйэтэ, Аан дойдутааҕы хомус киинин, түмэлин директора Д.Д.Бястинов, бырайыак айар бөлөҕө кытыннылар. Хомус биһигэ Бүлүүттэн улуус баһылыгын солбуйааччы А.А.Прокопьев, оройуон сэбиэтин бэрэссэдээтэлэ Г.С.Корякин, культура сайдыытын уонна норуот айымньытын оройуоннааҕы киинин салайааччытын эбээһинэһин толорооччу Н.В.Додутов, Бүлүү куоратын депутаттарын сэбиэтин бэрэссэдээтэлэ С.М.Саввинова, библиограф М.П. Дмитриева кинигэҕэ санааларын эттилэр, авторга махталларын тиэртилэр.
Аан дойдуга тиийэр дьоһун суолталаах хомус сайдыытын историятын сиһилии кэпсиир бөдөҥ үлэни билиһиннэрии истиҥ сылаас тыыҥҥа, сыыйа тардыыны үйэтиппит Х.Ф. Таскина кыыһа С.П.Харлампьева хомуһун тыыннаах дорҕоонунан доҕуһуолланан бэрт сэргэхтик ааста.
