Марк Жирков аатынан Оройуоннааҕы Культура Дыбарыаһыгар, балаҕан ыйын 30 күнүгэр Амма улууһун Бастакы кулубата Афанасий Петрович Рязанскай төрөөбүтэ 150 сылыгар уонна Саха Өрөспүүбүлүкэтигэр Үлэ сылларыгар аналлаах Аан Дойдутааҕы худуоһунньуктар федерацияларын уонна Арассыыйа худуоһунньуктарын айар сойууһун чилиэнэ, Амма улууһун, Сулҕаччы нэһилиэгин Бочуоттаах олохтооҕо, Саха Өрөспүүбүлүкэтин култууратын туйгуна, Арасыыйа худуоһунньуктарын айар сойууһун Кыһыл көмүс мэтээлин уонна Амма улууһун “Уран ууһа” бэлиэ хаһаайына Николай Рязанскай тыа сирин дьонун олоҕун уратытык туойар “Төрөөбүт дойдум дьүһүлгэнэ” персональнай быыстапкатын үөрүүлээх түмүктээһинэ буолан ааста.
Николай Рязанскай үлэлэрин көрдөххө, сайылык дыргыл мүөттээх салгына кэлэр, сылгы кистиир, ынах маҥырыыр, сыарҕа тыаһыыр, бэл, “һай” диэн саҥа иһиллэргэ дылы. Онно көмүлүөк иннигэр – олоҥхо алыптаах киэһэтэ. Бу эбээ сиэнигэр күөрчэх ытыйа турар, өрүскэ оҕолор сөтүөлээн чомполоноллор. Николай Рязанскай айар үлэтэ саха киһитин кутугар-сүрүгэр сыттыын-сымардыын, тыастыын-уустуун чугас, күндү. Бу быыстапка Бүлүү дьонун, кэнчээри ыччатын сэҥээриитин, махталын, тапталын ылыан ылла! Кэккэ күннэр усталарыгар 600 киһи сылдьан сөхтө, махтайда. Хас биирдии киһи тус бэйэтигэр туох эмит саҥаны, сырдыкка, үтүөҕэ тардыһыыны, сонуну арыйбыта буолуо диэн эрэнэбит. Надежда Николаевна Иванова көҕүлээһининэн кэлбит ыалдьыттары Бүлүү куоратын ытык, бэлиэ сирдэринэн сырытыннарда.
Николай Николаевичка эҕэрдэ тылларын тиэртилэр “Бүлүү улууһа (оройуона)” баһылыгын социальнай боппуруостарга солбуйааччы Александр Анатольевич Прокопьев, “Бүлүү куорат” муниципальнай тэриллии баһылыгын аатыттан Н.И. Ылахова аатынан «Алгыс» НКК директора Алена Павловна Спиридонова, Марк Николаевич Жирков аатынан Оройуоннааҕы Культура Дыбарыаһын уус-уран салайааччыта, Саха Өрөспүүбүлүкэтин культуратын туйгуна Алена Алексеевна Иванова, Саха Өрөспүүбүлүкэтин культуратын үтүөлээх үлэһитэ, Бүлүү улууһун Бочуоттаах олохтооҕо, Оройуоннааҕы Культура Дыбарыаһын методиһа Надежда Николаевна Иванова.
Түмүккэ Николай Рязанскай быыстапка тэрийиитигэр өйөбүл, көмө буолбут дьонноругар махтал суруктарын туттарда. «Туһа киһитэ» хартыынатын репродукциятын Бүлүүтээҕи оҕо искусство оскуолатын иһинэн үлэлиир Оҕо ойуулуур-дьүһүннүүр филиалын сэбиэдиссэйигэр Афанасий Егорович Ивановка уонна «Амма Хотун» репродукциятын Оройуоннааҕы Культура Дыбарыаһын салайааччытыгар Алена Александровна Дашевскаяҕа бэлэх уунна.
Ытыктабыллаах Николай Николаевич, саҥаттан саҥа айымньылар айылла турдуннар, көрөөччү кэрэхсэбилин, бар дьонуҥ сэҥээриитин, тапталын, махталын ыла тураргар ! Тус бэйэҕэр уонна чугас дьоҥҥор этэҥҥэ буолууну аныыбыт!
