Бүлүү — хомус түөлбэтэ, саха хомуһун аар-саарга ааттаппыт хоҥкунас тыастаах хомуһу оҥорооччулар, «бүлүүлүү сыыйа тардыы» алыптаах иэйиитинэн долгуппут хомуска оонньооччулар уутуйан үөскээбит туоналара.
Муус устар 21 күнүгэр Бүлүүгэ Аан дойдутааҕы хомус Киинин уонна Түмэлин быыстапкалыыр саалатын сэбиэдиссэйэ Туяра Анатольевна Жиркова, экскурсовод Алена Гавриловна Платонова ыалдьыттаатылар.
Специалистар Бүлүү улууһун баһылыга С.Н. Винокуровы кытта көрүстүлэр.
Салгыы Уус кыһатыгар «Өбүгэ утума – наследие предков” түмсүү салайааччыта Виктория Алексеевна Леонтьева Саха Өрөспүүбүлүкэтин Ил Дарханын Гранынан ылбыт бырайыагынан буола турар VI аһаҕас «Күөрт күпсүйдүн, тимир ыллаатын!» быыстапкаҕа сылдьан кэрэхсээтилэр. Норуот маастардара, уустар Иван Тимофеевич Павлов-Утум Уус, Николай Ильич Гоголев-Бычаа уус олохтоох тимир уустарын оҥоһуктарын көрдөрдүлэр, кэпсээтилэр.
П.Х. Староватов аатынан Бүлүүтээҕи кыраайы үөрэтэр түмэл филиалыгар И. Ф. Захаров-Кылыадьы Уус аатынан Хомус Дьиэтигэр Түмэл фондатыттан «Бүлүү чулуу уустара» диэн быыстапканы туруордулар. Быыстапка аһыллыытыгар култуура сайдыытын уонна норуот айымньытын оройуоннааҕы Киинин салайааччыта А.А. Дашевская, филиал сэбиэдиссэйэ Екатерина Прокопьевна Михайлова, Саха Өрөспүүбүлүкэтин культуратын үтүөлээх үлэһитэ, импровизатор-хомусчут Августина Платоновна Евсеева кыттыыны ыллылар.
Туяра Анатольевна Түмэл аатыттан Михаил Николаевич Мальцевы –Кылаан Ууһу, Николай Ильич Гоголевы-Бычаа Ууһу үбүлүөйдээх саастарынан эҕэрдэлээтэ, И.М. Гоголев-Кындыл аатынан библиотекаҕа И.Е. Алексеев-Хомус Уйбаан кинигэтин туттарда.
Тэрээһини Н.Г.Чернышевскай аатынан Бүлүүтээҕи профессиональнай-педагогическай колледж “Айылгы” үҥкүү-ырыа народнай ансамблын фольклорга салайааччыта Татьяна Андросова, Туяра Жиркова хомуска оонньоон киэргэттилэр.
М.Н.Жирков аатынан оройуоннааҕы култуура Дыбарыаһыгар биир дойдулаахпыт, филологическай наука доктора, профессор, академик, Аан дойдутааҕы хомус Киинин уонна Түмэлин төрүттээбит Россия уонна Саха АССР культуратын үтүөлээх үлэһитэ, Дьокуускай к., Бүлүү уонна Эдьигээн улуустарын бочуоттаах олохтооҕо ИВАН ЕГОРОВИЧ АЛЕКСЕЕВ — ХОМУС УЙБААН туһунан «Хомус — мин кынаттыыр доҕорум» диэн документальнай киинэтин биһирэбилэ буолла.
Аан дойдутааҕы хомус Түмэлигэр уонна Киинигэр Бүлүү хомуһун тарҕатыыга, хомуска оонньооччуларын киэҥ эйгэҕэ таһаарыыга өйөбүллэрин, көмөлөрүн иһин барҕа махталбытын тиэрдэбит.
«Бүлүү чулуу уустара» быыстапка Бүлүүгэ биир ый устата туруоҕа.
Кэлиҥ, сылдьыҥ, кэрэхсээҥ, улууспут талааннаах уустарынан киэн туттуҥ!
Хомус барахсан угуйар тойуга өрүүтүн үрдүккэ кынаттыы, ыҥыра туруохтун!
