М.Н.Жирков аатынан Оройуоннааҕы култуура Дыбарыаһыгар алта уордьаннаах албан ааттаах хомсомуол 105 сааһыгар аналлаах үөрүүлээх тэрээһин буолла. Биэчэри ыытааччы Саха Өрөспүүбүлүкэтин култууратын туйгуна Николай Афанасьев — Айдаман көрсүһүүнү сценаҕа урукку хомсомуол ыччат мунньаҕын президиумун ыҥыран саҕалаата. Мунньах бэрэстээтэлэ — актыыбынай комсомолец, Бүлүүтээҕи комсомол райкомун секретара Ф.Ф Николаев. Тыл эттилэр: «Күүлэт» совхоз комкомун чилиэнэ Гаврил Петров, Степан Аржаков аатынан совхоз комкомун чилиэнэ Николай Иванов.
Дьоро киэһэҕэ кэрэхсиир ырыаһыттарбыт Иван Данилов, Наталья Жиркова, Августина Семенова, Гаврил Иванов, «Сулус суһума» бөлөх эдэр ырыаһыта Айысхаана эдэр сааспыт умнуллубат ырыаларын бэлэхтээтилэр.
«Вилдэнс», «Кэрэли» үҥкүү коллективтара (салайааччы Юлия Фёдорова), «Алгыстаана» үҥкүү ансамбла (салайааччы Ольга Павлова) үҥкүүнэн киэргэттилэр. Саха Өрөспүүбүлүкэтин үтүөлээх үлэһитэ Иван Туласыновы баяҥҥа доҕуһуоллаата.
Биэчэр устата араас көрдөөх күрэхтэр сэргэхситтилэр. Икки хамаанданан урукку агитбригаданы санаттылар. Саалаҕа олорооччулар бары караокенан «Эн, комсомол, мин дьолум!», «Аан дойду ыччатын сүрэҕэ» ырыалары көхтөөхтүк ыллаатылар.
Эллэй «Өрүөл кэриэһэ» хоһоонун өйтөн ааҕыы кыайыылааҕынан Николай Семенович Николаев буолла.
Ди-джей Прокопий Иванов эдэр саас үҥкүүлэрин үҥкүүлэтэн үөрдүлэр, астыннылар. Үөлээннээхтэр көрсүһүүлэрэ Светлана Харлампьева алгыстаах үҥкүүтүнэн түмүктэннэ.
Хомсомолтан кынат тардыммыт олоххо өрүү көхтөөх, хаһан да кырдьыбат сүрэхтээх көлүөнэҕэ махтал!
