Бүгүн, муус устар 21 күнүгэр, Сэбиэт былааһын иһин охсуһууга Хохочой сис тыатыгар буолан ааспыт алдьархай 100 сылыгар аналлаах кэриэстэбил күнэ ыытылынна.
1922 сыл муус устар 18 күнүгэр буолбут тэҥэ суох хапсыһыыга тыыннарын толук уурбут кыһыл байыастар ааттарыгар сүгүрүйэн «Бүлүү улууһа» МТ баһылыга С.Н.Винокуров, Өкүндү нэһилиэгин баһылыга Н.В.Петров, Бөкчөҥөө нэһилиэгин баһылыга Прокопьев А.И., нэһилиэк ытык кырдьаҕаһа Н.Н.Иванов, улуус бэтэрээннэрин сэбиэтиттэн Д.С. Седалищев тыл эттилэр, ол суостаах кэмнэри ахтан санаан аастылар.
Мустубут дьон байыастары биир мүнүүтэ иһийэн кэриэстээтилэр. Умнубат өйдөбүл бэлиэтин кыһыл лиэнтэнэн эргитиллибит күөх харыйа гирлянданы, гвоздика сибэккилэри уурдулар.
Кэлэр көлүөнэ оҕо- ыччат Хохочой туһунан хоһоон ааҕан, ырыа ыллаан тэрээһин ис хоһоонун, суолтатын ситэрэн биэрдилэр.
Күн иккис аҥарыгар Өкүндү оскуолатын бу бэлиэ күҥҥэ анаан оҥорбут «Zа победу» диэн бырайыагынан байыаннай патриотическай оонньуу тэрилиннэ. Хампа, Тааһаҕар, Чинэкэ, Бөтүҥ, Өкүндү оскуолаларын хамаандалара бэйэлэрин эт -хаан өттүнэн бэлэмнэрин тургуттулар.
