2022 сыл түмүгүнэн саха бастыҥ киинэлэрин талыы түмүктэннэ.
“Чыпчаал” киинэ бириэмийэтин 10 номинациятын кыайыылаахтара быһаарылыннылар.
«Бастыҥ артыыс» диэн үрдүк аат бүлүүлэр биир дойдулаахпыт Гаврил Менкяровка ананна! Наҕарааданы Гаврилга эмиэ биир дойдулаахпыт театр уонна киинэ артыыһа, СӨ үтүөлээх артыыһа Степан Дмитриевич Петров туттарда.
Ааспыт сылга экраҥҥа тахсыбыт «Дьулуур: мас-рестлинг» (режиссер Валентин Макаров) киинэтэ дойду кинотеатрдарыгар көстөн көрөөччүлэр үрдүк биһирэбиллэрин ылбыта. Сүрүн оруолу толорбут Гаврил Менкяров элбэх көрөөччү кутун туппута. Киинэ II “Алафейскай хайа” бэстибээлгэ «Бастыҥ режиссура» уонна «Бастыҥ эр киһи оруола» диэн номинацияларга кыайбыта.
«Бастыҥ киинэ» номинация кыайыылааҕынан «Кэрэни көрбүт» (режиссер Любовь Борисова) буолла. «Саха киинэтин сайдыытыгар сүдү кылаатын иһин» ааты Алексей Романовка биэрдилэр.
Гаврил Семеновиһы ис сүрэхтэн эҕэрдэлиибит, киэн туттабыт! Айар үлэ алыптаах абылаҥар куустаран өссө да үгүс көрөөччүнү кэрэхсэтэр оруоллары айа сылдьарыгар баҕарабыт!
