Бүгүн, муус устар 4 күнүгэр, саха норуотун уһулуччулаах уола, биллиилээх государственнай-политическай деятель, республикабытын 17 сыл устата быһаччы салайбыт сүдү киһибит, республика бүтүннүүтэ киэн туттар биир дойдулаахпыт Г.И.Чиряев төрөөбүтэ 97-с сылыгар анаан сэбиэскэй-партийнай, уопсастыбаннай үлэ бэтэрээннэрэ улуус, нэһилиэктэр баһылыктарын, тэрилтэлэр салайааччыларын кытары көрсүһүүлэрэ тэрилиннэ.
М.Н.Жирков аатынан култуура дыбарыаһыгар Г.И.Чиряев олоҕун, үлэтин кэпсиир быыстапканы, историческай сааланы мустубут дьон сэргээн көрдө. Салгыы кинилэр Г.И.Чиряев норуокка анаабыт олоҕун, албан аатын үйэтитии тула кэпсэтиигэ көхтөөхтүк кытыннылар.
Көрсүһүүгэ кэлбит ветераннары бэлиэ күҥҥэ мустубуттарынан улуус баһылыга С.Н.Винокуров, республикабыт культураҕа уонна духовнай сайдыыга министрэ Ю.С.Куприянов эҕэрдэлээтилэр
Ытыктыыр аҕа саастаах дьоммут Кыадаҥдаттан Д.Г.Томскай, Бүлүүттэн А.С.Волков Гавриил Иосифовичтыын алтыспыт кэмнэрин ахтан-санаан, «Ытык сүбэттэн» В.А.Васильев, Н.В.Матвеев ыччаты иитиигэ болҕомто ууруллара наадатын ыйан туран, үйэтитиигэ бэйэлэрин санааларын эттилэр.
Сүдү киһибит аатын үйэтитиигэ Чочу нэһилиэгин баһылыга П.А.Догоюсов. Г.И.Чиряев аатынан Бүлүү к. 1 № -дээх оскуолатын директора В.С.Степанова, Г.И.Чиряев музейын директора М.С. Томскай Кыадаҥдаҕа Чиряевтар уһаайбаларын, өтөхтөрүн чөлүгэр түһэрэри, саҥа таас музей тутуутун, куорат оскуолатыгар баар сквери аныгылыы саҥардары туруорсалларын иһитиннэрдилэр. Улахан кэрэхсэбили Гавриил Иосифович туһунан сотору кэминэн тахсыахтаах кинигэ ылла. Бу дьоһун үлэ ис хоһоонун Саха национальнай библиотекатын библиограба Т.Н.Семенова сэгэтэн билиһиннэрдэ. Киирбит этиилэри барытын улуус баһылыгын социальнай политикаҕа солбуйааччы А.А.Прокопьев биир-биир ырытан, быһааран биэрдэ.
Түмүккэ, аны үс сылынан буолуохтаах тапталлаах республикабыт сайдыытыгар сүдү кылаатын киллэрбит Саха норуотун уһулуччулаах уола Гавриил Иосифович Чиряев төрөөбүтэ 100 сылын көрсө, кэлэр көлүөнэ ыччаттарга үйэлэргэ хаалар суолталаах үлэлэр ыытыллыахтара диэн, көрсүһүү кыттыылаахтара бигэ эрэллээх тарҕастылар. Ити курдук, Бүлүүбүтүгэр хомус тыаһа доҕуһуоллаах, нарын ырыа бэлэхтээх биир ураты бэлиэ күн ааста.
