Тэрээһин СР култууратын туйгуна Алгысчыт Владимир Николаев -Тоорукча Иэйэхсит ыйыгар Алгыһынан, ыраастаныы туомунан, «Ыллык» түмсүү Далбар Хотуттара алаадьынан айах тутууларынан саҕаланна.
«Самаан сайыны көрсө» кэнсиэри иилээн-саҕалаан ыыппыт СР култууратын туйгуна Николай Афанасьев-Айдаман өрөгөйдөөх музыка доҕуһуолунан сэргэхтик сэгэйэн киирэн чуор куолаһынан Саха сиригэр Ырыа күнэ олохтоммут дьоро күнүн, Ньукуола чэчиэринньигин дьоро киэһэтинэн эҕэрдэлээтэ.
Сайыны, Ньургуһуну, Ырыаны уруйдуур кэнсиэри «Айылгы» ырыа-үҥкүү народнай коллективын (сал. В. Томскай) «Дьиэрэҥкэй» үҥкүүтун көрөөччүлэр дохсун ытыс тыаһынан көрүстүлэр.
Кэнсиэркэ киин балыыһа «Гармония» ырыа ансамбла ( сал. Н. И. Макарова, Р. В. Нестерова), «Кэрэли» үҥкүү ансамбла (сал. Ю. Федорова), «Сулус суһума» бөлөх ырыаһыттара Анастасия Митясова, Антонина Петрова, Мария Быканова, Олег Петров, Владимир Буслаев, Светлана Алексеева, Галина Егорова, эдэр ырыаһыттар Аким Федоров, Айсиэн, Валерий Трофимовтар, Виктория Михайлова, Анна Черкашина, бииртэн-биир кэрэ ырыаны бэлэхтээтилэр, көрөөччүлэр биһирэбиллэрин ылыахтарын ыллылар.
Кэнсиэри гитаранан ыллаабыт Муза Сергеева, Иван Митясов, Caлтанат Маччаева салайар «VZD» вокальнай-инструментальнай ансамбла (солистар Афелия Бугуева, Алгыстаана Сивцева, Салтанат Маччаева) киэргэттэ.
Хас ырыа, үҥкүү аайы экран кэрэ көстүүлэрэ нүөмэрдэри өссө ситэрэн тупсаран истилэр. «Ньургуһуннар» үҥкүү олохтоох фотограф Елена Протопопова хаартыскаларын дьүһүйүүтүнэн киэркэйдэ.
Кэнсиэр көрөөччүлэрэ караокенан дуоһуйа ыллаан астыннылар. Лена Михайлова бастыҥ ырыаһыт буолла, бириис тутта.
Көрөөччүлэр киирии билиэтинэн бэлэхтэри тутан өссө үөрдүлэр, астыннылар. Икки көрөөччү сааскы көҕөн кус тутуурданан соһуччу үөрдүлэр. Кимиэхэ эрэ сүөгэй, дьиэ сибэккитэ, оҕуруот, сибэкки рассадата түбэстэ.
Көрөөччүлэр дуоһуйан сынньаннылар, тэрийээччилэргэ махтаннылар.
Аныгы көрсүөххэ диэри!
